Айсен Николаев Өлөөн оройуонун сайыннарарга сорудахтаата

Бэҕэһээ, тохсунньу 13 күнүгэр, Ил Дархан Айсен Николаев Өлөөн эбэҥки национальнай оройуонун социальнай-экэнэмиичэскэй сайдыытын боппуруостарыгар видео-кэмпириэнсийэ сибээс нөҥүө мунньахтаата.

Айсен Николаевка министиэристибэлэр уонна биэдэмистибэлэр бэрэстэбиитэллэрэ үлэлэрин түмүгүн туһунан кэпсээтилэр, оройуон салалтатын уонна олохтоохторун этиилэрин киллэрдилэр.

«Өлөөн оройуона – өрөспүүбүлүкэ үрдүнэн Арктика оройуоннарыттан бүгүҥҥү күҥҥэ сайдыы өттүнэн биир бастыҥ көрдөрүүлээхтэрэ. Маныаха оройуон салалтатын уонна олохтоохторун үтүөлэрэ үгүс, кинилэр өр сылларга Саха сирин биир улахан муниципальнай оройуонун сайдарын туһугар үлэлииллэр. Үгүс бырайыактар олоххо киирэллэр, ол иһигэр оптоволокно ситимэ тардыллан соторутааҕыта Өлөөҥҥө киирдэ. Сотору оройуон үрдүнэн түргэн интэриниэт ситимэ тардыллан, сибээстэрэ тупсуо. Бу — Арктика олохтоохторун олохторун хаачыстыбатын тупсарарга олус улахан ситиһии буолар», – диэн Айсен Николаев бэлиэтээтэ.

Өрөспүүбүлүкэ баһылыга эппитинэн, кэнники сылларга оройуоҥҥа элбэх олорор дьиэ уонна социальнай эбийиэк тутуллар. Кылгас кэм иһигэр Өлөөн сэлиэнньэтин оскуолатыгар хапытаалынай өрөмүөн оҥоһулунна, саҥа миэбэлэнинэн уонна оборудованиенан хааччылынна.

«Мин «Сахаэнерго» АУо энэргиэтиктэригэр махтаныам этэ, кинилэр ыарахаттары аахсыбакка, Өлөөҥҥө саамай улахан дизельнэй электроыстаансыйаны туттулар. Сарсын Ээйик сэлиэнньэтигэр өссө биир дизельнэй электроыстаансыйа үлэҕэ киириэ.  Бу оройуону энэргиэтикэнэн хааччыйыыга улахан ситиһии буолар», – диэтэ Айсен Николаев.

Маны сэргэ, Ил Дархан Өлөөн бөһүөлэгин сайдыыта маастар-былаанынан эрэ барыахтааҕын ыйда. Итиэннэ сотору кэминэн олохтоохтор баҕа санааларын учуоттаан, бөһүөлэк иһинээҕи суолу аспааллааһыны, саҥа социальнай уонна олох-дьаһах эбийиэктэрин тутууну ыытыахха наадатын эттэ.

Өлөөн оройуонун баһылыгын солбуйааччы Иван Саввинов иһитиннэрбитинэн, оройуон 2022 сылы куһаҕана суох көрдөрүүлээх түмүктээтэ. Ол курдук Арктика бөлөҕөр 1 миэстэни, өрөспүүбүлүкэ муниципалитеттарын инвестиционнай килиимэтин туругунан уопсай эриэйтиҥҥэ 15 миэстэни ылбыттарын баһылык кэпсээтэ. Ааспыт сылга олохтоох бородууксуйаны оҥорон таһаарыыга улахан болҕомто ууруллан көмө оҥоһуллубут. Холобур, Ээйиккэ хортуоппуй бааһынатын оҥорон, аан бастаан  хортуоппуй үүнүүтүн ылбыттар. Ааспыт сыллааҕар таба төбөтүн ахсаана элбээбит. Иван Саввинов аны оҕуруот аһын харайар бааза тутулларыгар өйөбүл наадатын бэлиэтээтэ.

Оройуоҥҥа салгыы оптоволокно ситимэ тутуллар, Өлөөн – Дьилиҥдэ хайысхатынан уурулунна. «АЛРОСА» АХ уонна «Ростелеком» ПАУо бииргэ үлэлээһиннэрин көмөтүнэн Накыын – Ээйик – Үөһээ Муна хайысхатынан оптоволокно ситимэ тардылла сылдьар.

«Хаарбах дьиэттэн дьону көһөрүү» бырагырааманан 2022 с. 18 ыал көспүт, 4 кыбартыыралаах дьиэ Дьилиҥдэҕэ уонна 6 кыбартыыралаах дьиэ Өлөөҥҥө тутуллан киирбиттэр. 2023 с. Өлөөҥҥө 30 кыбартыыралаах, Харыйалаахха 12 кыбартыыралаах, Дьилиҥдэҕэ 10 кыбартыыралаах дьиэлэр тутуллан киирэллэрэ былааннанар.

Итини таһынан олохтоохтор тыа хаһаайыстыбатын сайыннарыыны, Арктика эрэгийиэнин нэһилиэнньэтин бородууктанан хааччыйыыны, кыыл табалар ахсааннарын салгынынан манааһыны эбии үбүлээһини, бөрөлөр ахсааннарын бэрээдэктээһини, авиабылаһаакканы өрөмүөннээһинин, о.д.а боппуруостары тоһоҕолоон бэлиэтээтилэр.

Айсен Николаев өрөспүүбүлүкэ Бырабыыталыстыбатыгар хочуолунайдары уларытыы, Ээйиккэ балыыһа уонна оскуола өрөмүөннээһинин, аныгылыы саҥа оройуоннааҕы мусуойу тутууну былааннааһын, эрэллээх радиосибээһинэн хааччыйыы, Өлөөн сэлиэнньэтин уулуссаларын аспааллааһын боппуруостарыгар үлэлэһэллэригэр сорудахтаата, ону таһынан анал успуорт оскуолатын тутуллуон сөбүн эттэ.