Айсен Николаев энэргиэтикэ ресурсатын көдьүүһүн үрдэтэр соругу туруорда

Ил Дархан Айсен Николаев «СӨ ОДьКХ» ГУП  уонна «Водоканал» хампаанньа 2022 сыллааҕы үлэлэрин-хамнастарын түмүгүн көрдө уонна чугастааҕы кэмҥэ соруктары туруорда.

Мунньахха ураты болҕомто энэргиэтикэ ресурсаларын көдьүүстээхтик туһаныыны үрдэтии боппуруостарыгар уурулунна.
Өрөспүүбүлүкэ баһылыга олох-дьаһах хаһаайыстыбатын тэрилтэтин салалтатыгар 2022 сылга туруоруллубут соруктары ситиһиилээхтик толорбуттарын, чуолаан, РФ ОДьКХ-н реформалааһыҥҥа пуондатын көмөтүнэн эбийиэктэрин үлэҕэ киллэрбиттэрин иһин махтанна.

Ол курдук, ааспыт сылга РФ ОДьКХ-н реформалааһыҥҥа пуондатын үбүлээһининэн Бороҕон сэлиэнньэтигэр «Восток-1» автоматизированнай хочуолунай үлэҕэ киирбитэ. Быйыл тэрилтэ пуонда суотугар итиинэн хааччыйар 9 эбийиэги тутар былааннаах. Бороҕоҥҥо «Запад-1» уонна «Запад-2» икки саҥа автоматизированнай хочуолунай тутуута саҕаланыа, ол 5 эргэ хочуолунайы солбуйуо. Ону таһынан итинник хочуолунайдар Томпо, Чурапчы, Таатта, Амма уонна Мэҥэ Хаҥалас улуустарыгар тутуллуохтара.
Оттон «Водоканал» хампаанньа РФ ОДьКХ-н реформалааһыҥҥа пуондатын үбүгэр Жатай бөһүөлэгэр уонна Үөһээ Бүлүү сэлиэнньэтигэр канализационнай-ыраастыыр ыстаансыйалары туттаран үлэҕэ киллэрдэ.

Тэрилтэ үлэтин өссө биир сүрүн хайысхатынан «Ыраас уу» федеральнай бырайыак буолар. «Водоканал» Үөһээ Бүлүү улууһун киинигэр уонна Андреевскай нэһилиэктэригэр магистральнай уу ситимин киллэрдэ. Хампаанньа билиҥҥи кэмҥэ Сунтаарга водозабор тутар.
Онтон «СӨ ОДьКХ» тэрилтэ Өлүөхүмэҕэ водозабору, Амма улууһун киинигэр уонна Алтан сэлиэнньэтигэр уунан хааччыйыы систиэмэтин салгыы тутар. Ити барыта өрөспүүбүлүкэ коммунальнай инфраструктуратын сайыннарыа уонна нэһилиэнньэ олоҕун усулуобуйатын тупсарарга кыаҕы биэриэ.

Ил Дархан Айсен Николаев Бырабыыталыстыбаҕа энэргиэтикэ ресурсаларын көдьүүстээхтик туһаныыны үрдэтии мэхэньиисимин ырытан оҥорорго соруйда. Онуоха үлэ икки хайысханан барыахтаах – олорор дьиэ-коммунальнай комплекс тэрилтэлэрин уонна туһанааччыларын ортотугар, бастатан туран, бүддьүөт тэрилтэлэригэр.
«Олох-дьаһах коммунальнай комплексын тэрилтэлэригэр былааннаах үлэ барар. Урукку ньиэп уматыгынан үлэлиир хочуолунайдар оннуларыгар балайда ыраас уматыгынан оттуллар саҥа хочуолунайдар тутуллаллар, технологическай саҥа быһаарыныылар ылыллаллар, цифровизация сайдар. Ол эрээри ити ресурсанан хааччыйааччылар эрэ. Биһиги сорукпут – туһанааччылар ортолоругар энэргиэтикэ ресурсаларын көдьүүһүн үрдэтиэхтээхпит, бастатан туран, бүддьүөт тэрилтэлэригэр – ол буолар сүрүн сорукпут», – диэн кини бэлиэтээтэ.