Айсен Николаев өрөспүүбүлүкэ Ил Дарханын стратегическай ыйаахтарын бырайыактарын оҥорууну түргэтэтэргэ соруйда

Айсен Николаев алтынньы 4 күнүгэр бэйэтин стратегическай ыйаахтара төһө олоххо киирэн эрэллэрин бэрэбиэркэлээтэ. Ил Дархан докумуоннар чэрчилэринэн бырайыактар бартыбыалларын оҥорууну түргэтэтэргэ соруйда.

Чуолаан, Ил Дархан бырабыыталыстыба чилиэннэрэ кыттыылаах быстах оробуочай бөлөх оҥоһулларын итиэннэ алтынньы 15 күнүгэр диэри болдьохтоон бартыбыалы бигэргэтэллэрин дьаһайда.

“9 стратегическай ыйааҕынан бартыбыал пааспардара – докумуоннар сыаллара, соруктара, болдьохторо, түһүмэхтэрэ сиһилии суруллан оҥоһуллубуттара. Судаарыстыбаннай бырагыраамалар ыйаахтар туолууларын өйүөхтээхтэр уонна бары структуралар дьайыылара сөбүлэһиллибит уонна көдьүүстээх буолалларын туһугар түмүктээх үлэни  ситиһэргэ үлэлиэхтээхтэр”, — диэн бэлиэтээтэ Айсен Николаев.

Маны тэҥэ кини биэдэмистибэлэр икки ардыларынааҕы дьайыылары күүһүрдэр наадалааҕын ыйда диэн иһитиннэрэр Ил Дархан, быраабыыталыстыба пресс-сулууспата.

Санатан эттэххэ, Ил Дархан өрөспүүбүлүкэ социальнай-экэнэмиичэскэй сайдыытыгар туһуламмыт 9 стратегическай докумуоҥҥа илии баттаабыта. Ыйаахтар дьадаҥы олоҕу утары охсуһууну, уопсастыба доруобуйатын бөҕөргөтүүнү, биир кэлим үөрэхтээһин, тырааныспар, энэргиэтикэ инфраструктуратын, креативнай экэниэмикэни, олохтоох оҥорон таһаарыыны, туризмы, о.д.а. хайысхалары сайыннарыыны таарыйаллар.