Айсен Николаев өрөспүүбүлүкэ судаарыстбаннай тэрилтэлэрин үлэһиттэрин идэлээх сойуустарын үлэтин сыаналаата

Ил Дархан Айсен Николаевы кытта көрсүһүүгэ судаарыстыбаннай тэрилтэлэр уонна уопсастыбаннай хааччыйыы үлэһиттэрин идэлээх сойуустарын биэс сыллаах үлэтин түмүгүн туһунан тэрилтэ бэрэссэдээтэлэ Вячеслав Алексеев билиһиннэрдэ.  

Вячеслав Алексеев бэлиэтииринэн, РФ Социальнай бииргэ үлэлэһии уонна Үлэ сылларын иитинэн өрөспүүбүлүкэҕэ улахан хамсааһын барбыт. Ураты болҕомтону уһуйааччы аатын сөргүтүүгэ, үлэ киһитин чиэстээһиҥҥэ, анал байыаннай дьайыы кыттыылаахтарын өйөөһүҥҥэ уурбуттар.

“Ааспыт сыл биһиэхэ дойду судаарыстыбаннай тэрилтэлэрин идэлээх сойууһун отчуоттуур-быыбардыыр хампаанньата ыытыллыытынан бэлиэ буолла. Ахсынньыга социальнай бииргэ үлэлэһиинэн Судаарыстыбаннай тэрилтэлэр үлэһиттэрин идэлээх сойуустарын киин кэмитиэтин президиумун мунньаҕар отчуоттаабытым. Биһиги өрөспүүбүлүкэбит үтүө уопутун бэлиэтээбиттэрэ” – диэн Вячеслав Алексеев этэр.

Айсен Николаев үлэһиттэр социальнай-үлэҕэ бырааптарын көмүскээбитигэр Вячеслав Алексеевка махтанан туран, идэлээх сойуус үлэтин үрдүктүк сыаналаата. Судаарыстыбаннай гражданскай уонна муниципальнай сулууспа суолтатын өссө үрдэтиигэ үлэни күүһүрдэргэ эттэ.

Ил Дархан уонна Бырабыыталыстыба пресс-сулууспата.