Айсен Николаев гаас-мотуор уматыга тиийбэт балаһыанньата хатыламматыгар сорудахтаата

«ЯТЭК» ПАУо 2024 сылга үп-хаһаайыстыбаннай үлэтин уонна 2025 сыллааҕы былааннарын көрөр мунньахха Айсен Николаев Дьокуускайга бу сайын тахсыбыт балаһыанньаны хаттаан таһаарбат туһунан модьуйда.

Саха сирин баһылыга 2024 сылга хампаанньаҕа үгүс үлэ ыытыллыбытын бэлиэтээтэ. Хампаанньа 1,84 млрд кубометр айылҕа гааһын уонна 119 тыһ. туонна гаас конденсатын хостообут.

«Бүгүн хампаанньа үлэтиттэн Бүлүү, киин уонна илин эҥэр оройуоннары гаастааһын тэтимэ тутулуктаах. 2024 сыл түмүктэрэ куһаҕана суохтар. Үгүс производственнай уонна социальнай бырайыактар олоххо киирдилэр«,— диэтэ кини.

Айсен Николаев оҥорон таһаарыы кыамталарын улаатыннарыы үлэтигэр болҕомтотун уурда. 2024 сыл суолталаах бырайыактарыгар — метанол регенерациятын туруорууну үлэҕэ киллэрии, конденсакка резервуардары тутуу, уопсай дьиэлэри, ыскылааттары тутууну түмүктээһин.
Маны тэҥэ ааһан эрэр сылга саҥа скважиналары холбооһун түмүктэнэн, гааһы хомуйуу ситимин бигэ туруктаах оҥорбут. Уот саҥа комплексын тутуу түмүктэнэр. Бу бырайыак саахал тахсарын аччатыа, уотунан хааччыйыыны туруктаах оҥоруо, экологияҕа дьайыытын аччатыа. Өрөспүүбүлүкэ баһылыга саҥа бырайыактары олоххо киллэриигэ гаас саппааһын салгыы элбэтэргэ ыйда. Гаас магистралыгар холбонор кыаҕа суох тыа сирин хочуолунайдарыгар оттук быһыытынан ыгыллыбыт углеводороднай гааһы туһаныы бырайыагын ааттаата. Айылҕа гааһын экэниэмикэ атын салааларыгар туһанарга этии киллэрдэ.

Айсен Николаев хампаанньа социальнай өттүнэн эппиэтинэстээҕин бэлиэтээтэ, ону Кыһыл Сыыр олохтоохторо эмиэ этэллэр. Бу нэһилиэнньэлээх пууҥҥа тэрилтэ көмөтүнэн аныгы скейт-паарка тутуллубут, олох-дьаһах өҥөтүн оҥорор киин бырайыага оҥоһуллубут. Салгыы эрэгийиэн баһылыга бу бөһүөлэк олохтоохторун тырааныспарынан сырыыларын хааччыйарга авиационнай былаһаакканы тутууну толкуйдуурга сүбэлээтэ.
Ньиэп-гаас бырамыысыланнаһын каадырдарын бэлэмнээһинигэр үчүгэй тэтим баарын эттэ. Ол ЯТЭК Кыһыл Сыыры тэҥэ Бүлүү оройуонун атын оскуолаларыгар инженернэй кылаастары арыйдаҕына өссө тупсуо.
Хампаанньа кэлэр сылга производственнай эбийиэктэрин салгыы саҥардыаҕа, ону тэҥэ Кыһыл Сыырга саҥа инфраструктурнай эбийиэктэри киллэрэр былааннаах.
Газовиктар аллеяларын тутуу торумнаммыт. Бытовой өҥөлөрү оҥорор киини оҥоруу дьон олоҕун тупсарыаҕа.

Саха Өрөспүүбүлүкэтин Ил Дарханын уонна Саха Өрөспүүбүлүкэтин Бырабыыталыстыбатын пресс-сулууспата