Психологтар госпитальга 2023 сыл муус устар ыйыттан үлэлииллэр. Айсен Николаев психологтарга байыаннай дьайыыга көмөлөрүн иһин махтанна.
«Үлэ олус сатабыллаахтык барда. Эһиги биһиги байыастарбытыгар, кинилэр дьиэ кэргэттэригэр уустук кэмҥэ өйөбүлү оҥороҕут. Бу сылдьан аҥардас Саха сирин эрэ сулууспалаахтарын кытта буолбакка, атын эрэгииэн байыастарыгар эмиэ тирэх буолаҕыт. Киин үлэлээбитин устатын тухары уопсайа 18 тыһыынча көмө оҥоһуллубут. Бу мээнэ сыыппара буолбатах, бу уопсай дьыалаҕа кыайыыны чугаһатар кылаат буолар», – диэн Айсен Николаев махтанна.
Социальнай-психологическай киин дириэктэрин солбуйааччы Октябрина Туприна бэлиэтээбитинэн, үлэни тэрийии олуга Арассыыйа научнай-чинчийэр кииннэрин кытта ыкса үлэлэһиигэ сытарын эттэ. Тоҕо диэтэххэ, байыаннай уонна чөлгө түһэргэ көмөлөһөр психолог ахсаана олус аҕыйах. Онон суһаллык 40 исписэлииһи Федеральнай научнай киин баазатыгар үөрэттэрбиттэр.
«Үлэ уопута байыаннай сулууспалаах туругун анаалыстааһынтан саҕаланар. Ол курдук байыаннай сулууспалаах эйэлээх олоххо этэҥҥэ төннөрүгэр көмөлөһөбүт», – диэтэ киин дириэктэрин солбуйааччы.
Киин диагностикалыыр-коррекционнай салаатын сэбиэдэссэйэ Лена Авелева байыаннай сулууспалаахтар дьиэ кэргэттэрин кытта үлэни кэпсээтэ. Аҥардас кэпсэтии эрэ буолбакка, манна оҕолору кытта илиинэн ону-маны оҥоруу, айылҕаҕа сылдьыы барыта киирэрин бэлиэтээтэ.
Киин Алданнааҕы филиалаын психолога Анна Шамайда уонна Намнааҕы филиал педагог-психолога Нюргуяна Аргунова, Мэҥэ Хаҥалас филиалын педагог-психолога госпиталларга сылдьыбыттарын, үлэлэрин туһунан сырдаттылар. Кинилэр психолог үлэтэ аҥардас идэни эрэ баһылааһыҥҥа буолбакка, киһи аһыныгас дууһата ордук сүрүн суолталааҕын эттилэр.
Кэпсэтии түмүгэр Ил Дархан Айсен Николаев психологтар үлэлэрин үрдүктүк сыаналаата.
«Психологтар көмөлөрүн тэрийиини сөпкө оҥорбуппут диэҥҥэ өссө төгүл итэҕэйдим. Эһиги олус наадалаах үлэни оҥороҕут. Миэхэ байыастар, кинилэр чугас дьонноро суруйаллар. Махтаналлар», – диэн бэлиэтээтэ Ил Дархан.
2022 сылтан төрүт култуураны тарҕатааччыларга Ил Дархан истипиэндьийэтэ бэриллэр буолбута. Бу кэмтэн уопсайа 81 киһи…
Үөһээ Бүлүү улууһугар ыытыллар «Тыа сирин оскуолата уонна Үөрэх маарката-2025» XXI өрөспүүбүлүкэтээҕи педагогическай дьаарбаҥкаҕа Саха…
Саха сиригэр от ыйын 1 күнүттэн 2025-2026 сс. бултааһын сезонугар саамай тарҕаммыт бултка - көтөрү…
Байыаннай дьайыыга сылдьар хоһуун санаалаах хорсун ыччаттарга Кэбээйи улууһун Куокуй нэһилиэгэр "Надежда" иис түмсүүтэ тиһигин…
От ыйын 8 күнүгэр -- Дьиэ кэргэн күнүгэр Саха сириттэн Архангельскай, Магадаан уобаластарыттан эдэр пааралар…
Арассыыйа үрдүнэн мэдиссиинэ эйгэтигэр каадыр тиийбэтин кыһалҕата күүскэ бэлиэтэнэр. Бу боппуруоһу быһаарар биир ньыманан биэнсийэҕэ…