Айсен Николаев: «Хас биирдии тыл — норуот дууһата»

Балаҕан ыйын 8 күнүгэр дойду Бэрэсидьиэнэ Владимир Путин сорудаҕынан Арассыыйа норуоттарын тылларын күнүн бэлиэтииллэр. Бырааһынньыгынан СӨ Ил Дархана Айсен Николаев эҕэрдэлээтэ.

«Саха Сиригэр бу күн ураты суолталаах. Манна Хоту дойду тэбэр сүрэҕэр үйэлэр тухары үгүс норуоттар бэрэстэбиитэллэрэ бэйэлэрин үгэстэрин, култуураларын, төрөөбүт тылларын тутан олороллор. Хас биирдии тыл — норуот дууһата, өйө-санаата, муудараһа, аан дойдуну ураты көрүүтэ. Уонча тыл бииргэ иһилиннэҕинэ, дьикти дьүөрэлэһиини үөскэтэллэр. Саха сирин уонна Бүтүн Арассыыйаны ханна да хатыламмат оҥорор ураты күүс. Төрөөбүт тылларбытын харыстаан, сайыннаран, биир сомоҕолоһуубутун бөҕөргөтөбүт, култуурабытын байытабыт уонна кэлэр көлүөнэлэргэ сырдык кэскилин тэрийэбит, — диэн Айсен Николев ТГ-канаалыгар суруйда.

Санатан эттэххэ, быйыл бэс ыйыгар Владимир Путин саҥа бырааһынньыгы — Арассыыйа норуоттарын тылларын күнүн тэрийэргэ сорудахтаабыта. Ону судаарыстыба баһылыга сыл аайы балаҕан ыйын 8 күнүгэр, Сэбиэскэй бэйиэт Расул Гамзатов төрөөбүт күнүгэр, бэлиэтииргэ этии киллэрбитэ. Дойдуга барыта араас омуктар туһанар 270-тан тахса тыл, диалект официальнайдык билиниллэр.