Айсен Николаев ХИФУ сайыннарыытын сүрүн хайысхаларын көрдө

Айсен Николаев М.К. Аммосов аатынан Хотугулуу-Илиҥҥи федеральнай университет үлэтин хайысхаларынан сүбэ мунньаҕы ыытта.

«ХИФУ — өрөспүүбүлүкэ сүрүн үөрэх тэрилтэтэ, бүтүн өрөспүүбүлүкэҕэ научнай сайдыы уонна каадыры бэлэмнээһин тирэҕинэн буолар. Манна биһиги инники кэскилбит үөскүүр — интеллектуальнай, бырамыысыланнас, социальнай. Онон чуолаан университет сайдыытын боппуруостара болҕомто киинигэр туруохтаахтар», — диэн бэлиэтээтэ өрөспүүбүлүкэ салайааччыта.

Биир сүрүн тиэмэнэн каадыры тус сыаллаах бэлэмнээһин тиһигин көрүү буолла. ХИФУ ректора Анатолий Николаев иһитиннэриитинэн, университекка сыл аайы 500-чэкэ абитуриент киирэр, ол эрээри былырыын тус хайысханан ылыллыбыт дьон ахсаана 258-кэ диэри намтаабыт. Манан сибээстээн «Работа в России» биир кэлим сыыппара платформаны нөҥүө тус сыаллаах бэлэмнээһиҥҥэ сайаапкалары киллэрии, ону тэҥэ тус сыаллаах министиэристибэлэр уонна биэдэмистибэлэр өттүттэн каадыр тиийбэт буолуутун хонтуруоллааһын күүһүрдүөххэ диэн этилиннэ.

Мунньах кыттыылаахтара анал байыаннай дьайыы кыттыылаахтарын уонна кинилэр дьиэ кэргэттэрин чилиэннэрин өйүүр миэрэлэри кэҥэтиини көрдөстүлэр. ХИФУ бу сыалга наадалаах көмөнү оҥорууга, материальнай өйөбүлү уонна үөрэххэ тус сыһыаны киллэриигэ туһааннаах үлэни ыытар.

РФ билимҥэ уонна үрдүк үөрэхтээһиҥҥэ министиэристибэтин көҕүлээһининэн 2021 сылга үлэҕэ киирбит «Приоритет- 2030» федеральнай көҕүлээһин чэрчитинэн ХИФУ сайдыытын саҥа түмүктэрэ этилиннилэр. Сыала-соруга — эрэгийиэннэр уонна дойду научнай-тэхиниичэскэй социальнай сайдыыларын киининэн буолар кыахтаах университеттар бөлөхтөрүн тэрийэр. Университет технологическай бырайыактарын көрдөрдүлэр. ХИФУ экспертнэй ырытыы түмүгүнэн дойду 22 университетын ахсааныгар сүрүннээн үс бырагыраамаҕа хандьыдаат статуһун ылбыттар ахсааныгар киирдэ.

Ону таһынан билим уонна педагогическай каадыры бэлэмнээһин кэскилэ, ону тэҥэ салаалары кытта бииргэ үлэлээһини бөҕөргөтөр дьаһаллары дьүүллэстилэр. Айсен Николаев сүбэ мунньах түмүгүнэн ХИФУ сайыннарыытын бары тутаах хайысхаларыгар координациялааһынын хааччыйарга сорудахтаата.