Айсен Николаев Ил Түмэн салалтатын уонна бэрэссэдээтэллэрин кытта көрүстэ

Ил Түмэн пленарнай мунньаҕар бэлэмнэнии чэрчитинэн, Ил Дархан Айсен Николаев бүгүн, алтынньы 20 күнүгэр, парламент сис кэмитиэттэрин салалталарын уонна бэрэссэдээтэллэрин кытта оробуочай көрсүһүүтүн ыытта, диэн www.sakha.gov.ru иһитиннэрэр.

Айсен Николаев парламентарийдары кытта сокуон көҕүлээһиннэрин, ол иһигэр «Төрүт сокуоҥҥа уларытыылары, эбиилэри киллэрии туһунан», «СӨ 2026 сылга уонна 2027 уонна 2028 сыллар былааннаах кэмнэригэр судаарыстыбаннай бүддьүөтүн туһунан» сокуон барылларыгар уларытыылары киллэрии туһунан дьүүллэстэ.

«Бу бырайыактар хас биирдиилэрэ нэһилиэнньэҕэ олус наадалаахтар. Төрүт сокуоҥҥа киллэриллэр уларытыылар Төрүт сокуон уонна федеральнай сокуоннар икки ардыларыгар араастаһыылары туораталлар. Кинилэр юридическай өттүнэн бэрэбиэркэлэммиттэрэ, федеральнай сокуоҥҥа толору сөп түбэһэллэр уонна биһиги Төрүт сокуоммутугар баар сорох ис утарсыыларын суох оҥороллор», – диэн бэлиэтээтэ Айсен Николаев.

Ил Дархан үлэ биир сүрүн соругунан, эрэгийиэҥҥэ экэнэмиичэскэй өттүнэн туруктаах буолууну харыстааһыны бэлиэтээтэ. Кини этэринэн, нэһилиэнньэ иннигэр социальнай эбэһээтэлистибэлэри толоруу судаарыстыбаннай бүддьүөтү ылыныыттан тутулуктаах буолуоҕа.  2026 сылга  тыа хаһаайыстыбатын үбүлээһинэ быйылгы таһымҥа хаалыаҕа», – диэн бэлиэтээтэ Айсен Николаев.

Ил Дархан тэрээһин кэмигэр Ил Түмэн бэрэссэдээтэлэ Алексей Еремеев уонна парламент сис кэмитиэттэрин салайааччылара СӨ Бырабыыталыстыбатыгар бүддьүөт, нолуок уонна социальнай бэлиитикэ туһунан ыйытыыларыгар хоруйдаата.

Санатар буоллахха, саҥа сокуоннар бырайыактара алтынньы 22 күнүгэр сэттис ыҥырыылаах Ил Тумэн уон төрдүс (уочараттаах) пленарнай мунньаҕар көрүллүөхтэрэ.