Айсен Николаев инфекционнай балыыһа тутуутун туһунан хоруйдаата

ГТРК «Саха»  “Прямой разговор” биэриитигэр элбэх оҕолоох ийэ эрийэн, Ил Дархан Айсен Николаевтан “Сыстыганнаах ыарыылары эмтиир балыыһа хаһан тутуллуой?” диэн ыйытта.

Онуоха Айсен Николаев:

— Дьиҥэр бу эбийиэги тутуу былааннаммыта ыраатта.  Пандемия кэмигэр  маннык балыыһа баар буолуохтааҕа булгуччулааҕын көрдөрдө. Бу эбийиэги тутууга бырайыактыыр симиэтэтэ билигин бэлэм сытар. Докумуоннар федеральнай эспэртиисэни ааспыттара. Ол эрээри,  бу үп-харчы өттүттэн ыарахан сыаналаах бырайыак – быһа холоон 9 миллиард солкуобай курдук үп ирдэнэр. Онон, бу ыйытыыны мин дойдубут Бэрэсидьиэнигэр Владимир Путинҥа биэрбитим – кини быһаарыыта суох маннык улахан бырайыактар хамсаабаттар. Бу балыыһаны тутарга өйөбүл ылыахпыт диэн эрэнэбин, — диэн хоруйдаата.