Айсен Николаев: «Кэнники 5 сылга ылбыт тэтиммит үгүстэри сөхтөрөр»

Балаҕан ыйын 26 күнүгэр Ил Дархан Айсен Николаев быһа эпииргэ тахсан, ыйытыыларга хоруйдаата, 5 сыллаах үлэ түмүгүн торумнаата.

— Кэнники 5 сылга ылбыт тэтиммит үгүстэри сөхтөрөр. Бүгүҥҥү күҥҥэ бырамыысыланнас көрдөрүүлэрин үүнүүтүнэн Уһук Илиҥҥэ бастакы, Арассыыйаҕа 6-с миэстэлээхпит. Бу уһулуччулаах көрдөрүү буолар. 2018 сылтан бырамыысыланнас көрдөрүүлэрин үүнүүтэ 50% үрдээтэ, баалабай бородуукта (ВВП) 2 төгүл улаатта (биэс сыллааҕыта 900 мөлүйүөн солкуобай эбит буоллаҕына, билигин 2 миллиард солкуобай кэриҥэ).

Таас чоҕу, ньиэби, алмааһы хостооһуҥҥа историческай көрдөрүүлэри куоһардыбыт. Бу барыта дьон олоҕун таһыма тупсарыгар, өрөспүүбүлүкэ сайдарыгар туһуланар. 2023 сылга диэри, 5 сыл иһигэр 274 улахан социальнай эбийиэктэр тутулуннулар. Бу — үөрэх кыһалара, култуура дыбарыастара, балыыһа комплекстара, о.д.а. Куораттар, сэлиэнньэлэрэ көстө тупсаллар, киэркэйэллэр. Кэнники үс ыйга улуустары барытын кэрийдим, аҕыйах Арктика улуустарыгар эрэ тиийбэтим, онно да сотору тиийиэҕим. Дьэ, онно сылдьан көрдөхпүнэ, бары улуустарга сайдыы, уларыйыы, хамсааһын барбыт.

Билигин уустук кэм, ол эрээри өссө улахан, элбэх сыаллары туруорунуохха наада. Инникигэ былааннар бааллар. Экэниэмикэбит сайдан иһэр, иннин диэки тэтимнээхтик хамсаттахха, тохтотор да уустук буолуо. Энэргиэтикэбит, тырааныспар систиэмэтэ үүнэр-сайдар тосхоллоохтор.

Бу 5 сыл иһигэр «ковид», баһаардар, халаан, байыаннай дьайыы, сааҥсыйалар буолбуттарын да иһин, бу уустуктары бары бииргэ түмсэн туораатыбыт, — диэн Айсен Сергеевич кэпсээтэ.