Айсен Николаев МАХ диэн Арассыыйа мессенджерын туттар

Айсен Николаев бэйэтин ханаалын MAX диэн саҥа цифровой платформаҕа ыытар. Билигин 3000-тан тахса сурутааччылаах.

Ил Дархан ый анараа өттүгэр арыйбыт официальнай страницатыгар маннык сигэнэн киирэҕин: https://max.ru/aisen_nikolaev

«Бүгүн цифровой технологиялар олохпут быстыспат сорҕото буолан эрэллэр. Миэхэ Саха сирин олохтоохторун кытта сибээскэ сылдьарым, дьон сарсыҥҥы күннэригэр эрэллээх буолалларын туһугар дьаһаллар уонна бырайыактар ​​туһунан кэпсиирим улахан суолталаах. MAX платформа хас биирдии киһилиин чугасаһарга өссө биир ньыманан буолар», — диэн эрэгийиэн баһылыга бу иннинэ эппитэ.

Балаҕан ыйын 27 күнүгэр, СӨ Судаарыстыбаннаһын күнүгэр Айсен Николаев «Быһа линиятын» кэмигэр MAX эмиэ туттуллубута. Аан бастаан бу мессенджер нөҥүө дьон боппуруостарын биэрбиттэрэ.

MAX диэн РФ Цифровой сайдыыга, сибээскэ уонна маассабай коммуникацияларга  министиэристибэтин уонна «Ростех» экосистематын тэрилтэлэрин өйөбүллэринэн VK хампаанньа оҥорбут аныгы цифровой платформата. Бары биллэр тэриллэргэ баар — iOS, Android, Windows, macOS уонна веб-версияларга.

МАХ-ка Арассыыйа эбэтэр Белоруссия төлөпүөннэрин нүөмэрдэринэн эрэ регистрацияланыахха сөп. Туһанааччы дааннайдара барыта Арассыыйа сервердарыгар, сокуону толору тутуһан хараллаллар.

Билигин туһанааччылар платформа сүрүн функцияларынан туһаныахтарын сөп:

— суруйсар уонна кэпсэтэр чааттарынан; — звоноктарынан; — 4 ГБ диэри файллары ыытыынан; — СБП нөҥүө харчыны көһөрүүнэн; — GigaChat-ка олоҕурбут чат-боттарынан.

MAX кэлин судаарыстыба өҥөлөрүн, ол иһигэр Госөҥөлөрү, цифровой ID уонна электроннай илии баттааһыннары көрдөрүөҕэ. Оччоҕо Саха сирин олохтоохторо сыһыарыыны кэпсэтиигэ, сибээскэ эрэ буолбакка, судаарыстыба уорганнарын кытта алтыһыыга, өҥөлөрү төлөөһүҥҥэ, цифровой докумуоннары харайыыга кытта туһанар буолуохтара, диэн иһитиннэрэр Ил Дархан, бырабыыталыстыба пресс-сулууспата.