Айсен Николаев Максут Шадаевы кытта көрүстэ

СӨ Ил Дархана Айсен Николаев Москваҕа үлэтинэн командировкатын чэрчитинэн РФ Сыыппараҕа сайдыыга, сибээскэ уонна маассабай коммуникацияларга миниистирин Максут Шадаевы кытта көрсүстэ.
«Биһиги өрөспүүбүлүкэ сыыппара инфраструктуратын бигэтик сайыннарыытыттан тутулуктаах сүрүн бырайыактары дьүүллэстибит. Сүрүн болҕомтону 2028 сылга диэри 61 нэһилиэнньэлээх пууҥҥа аныгы сибээһи хааччыйыахтаах «Арктика синергията» бырайыакка уурдубут. Бу көннөрү сибээс олохтооһун буолбатах, оттон олорор сириттэн тутулуга суох хас биирдии олохтоох аныгы сыыппара кыахтарынан туһанар усулуобуйатын тэрийии буолар.
Сэтинньи 27–29 күннэригэр Дьокуускайга ыытыллар IV «Сыыппара алмааһа» федеральнай пуоруму бэлэмнээһини туспа дьүүллэстибит. Өрөспүүбүлүкэ «ГосТех» платформаҕа көҕүлээһиннэрин көрдүбүт. Кинилэри олоххо киллэрии судаарыстыбаннай өҥө хаачыстыбатын үрдэтиигэ уонна олохтоохторго табыгастаах буолуутугар туһуланар. Биһиги технология туһугар буолбакка, дьон туһугар үлэлиир сыыппара систиэмэтин олохтуубут. Хас биирдии саҥа бырайыак дьиҥнээх туһаны аҕалыахтаах уонна Саха сиригэр олоҕу табыгастаах уонна аныгылыы оҥоруохтаах. Биһиги технология күннээҕи олох сорҕото уонна сайдыы тирэҕэ буолар сыыппара Саха сирин тутабыт», — диэн Айсен Николаев МАХ мессенджергэ көрсүһүү түмүгүн кэпсээтэ.
Көрсүһүүгэ өрөспүүбүлүкэ баһылыга уонна миниистир 2028 сылга диэри «Арктика синергията» социальнай хайысхалаах бырайыак олоххо киириитин хаамыытын, ону таһынан федеральнай бүддьүөттэн субсидия бэриллэрин суотугар бырайыагы үбүлээһин мэхэньииһимин көрдүлэр. «Арктика синергията» бырайыак Саха сирин 61 нэһилиэнньэлээх пуунун хабар, онно уопсайа 50 тыһыынча кэриҥэ киһи олорор. Дьүүллэһии өссө биир тиэмэтинэн быйыл сэтинньи 27–29 күннэригэр Дьокуускайга ыытыллар IV «Сыыппара алмааһа» федеральнай пуорум буолла. Кыттааччылары киэҥ ис хоһоонноох дьыалабыай бырагыраама күүтэр.
Пуорум тиэмэтинэн сибээс, дата-кииннэр уонна инфраструктура – бары аныгы сыыппараҕа технологияларга олоҕурар тирэхтэринэн буолуоҕа. Пуорум чэрчитинэн «Арктика синергията» бырайыак билиһиннэриитэ, «Кибер-күрэх» информационнай куттал суох буолуутугар күрэхтэһиилэр, HACK-the-ICE хакатон, хампаанньалар быыстапкалара уонна да атын салаа тэрээһиннэрэ былааннаналлар. «Сыыппара алмааһа» федеральнай пуорум 2022 сылтан сыл аайы ыытыллар. Кини сүрүн сыала – сыыппараҕа инфраструктураны сайыннарыы нөҥүө олох хаачыстыбатын үрдэтэр сыалтан бастыҥ технологиялары атастаһыы уонна стратегическай быһаарыылары бииргэ оҥорон таһаарыы. Үс сыл иһигэр пуорум үлэтигэр 70-тан тахса эрэгийиэнтэн 3 200-тэн тахса эспиэр уонна салаа исписэлииһэ кытынна, оттон онлайн-контент уопсай хабыыта 3,5 мөлүйүөнтэн тахса көрүүнү хомуйда.
Сообщить об опечатке
Текст, который будет отправлен нашим редакторам: