Айсен Николаев Мэҥэ Хаҥалас олохтоохторун уонна ыалдьыттарын ыһыаҕынан эҕэрдэлээтэ

Мэҥэ Хаҥалас улууһун Майа сэлиэнньэтин Ураһалааҕар ыһыах саҕаланна. Быйылгы бырааһынньыгы Арассыыйаҕа биллэриллибит Педагог уонна уһуйааччы, Саха сиригэр биллэриллибит Үлэ  уонна өрөспүүбүлүкэтээҕи спортивнай хамсааһын 100 сылларыгар анаатылар.

Улуус олохтоохторун уонна ыалдьыттарын Айсен Николаев эҕэрдэлээтэ. Ил Дархан тыл этэригэр Мэҥэ Хаҥалас улууһун олохтоохторо Саха сирин уонна дойду сайдыытыгар кылааттарын бэлиэтээтэ.

“Бүгүн эһигини кытта ыһыаҕы бэлиэтиир долгутуулаах, үөрүүлээх. Мэҥэ Хаҥалас сирэ Саха сирин уонна Бүтүн Арассыыйаны аатырдыбыт элбэх дьону таһаарбыта. Билимҥэ, успуорка, култуураҕа, тыа хаһаайыстыбатыгар онтон да атын салааларга ситиһиилэммит биир дойдулаахтарбытынан киэн туттабыт. Сэбиэскэй Сойуус Дьоруойа Федор Попов курдук саха норуотун чулуу уолаттара өйбүтүгэр-сүрэхпитигэр куруук бааллар. Күн бүгүҥҥэ диэри Мэҥэ Хаҥалас улууһун олохтоохторо өрөспүүбүлүкэ уонна дойду социальнай-экэнэмиичэскэй сайдыытыгар сүҥкэн кылааттарын киллэрэллэр. Кэлиҥҥи сылларга улууска 19 социальнай эбийиэк тутулунна, өссө 18 эбийиэк тутулла турар. Үтүө түмүктэр тыа хаһаайыстыбатыгар, эргэрбит, саахалланар туруктаах дьиэлэртэн дьону көһөрүүгэ бааллар. Бу барыта улахан куораттар эрэ буолбакка, тыа сирин нэһилиэнньэлээх пууннарыгар эмиэ сайдыы барарын көрдөрөр”, — диэн Ил Дархан эттэ.

Айсен Николаев бырааһынньык иннинэ эрэ байыаннай эпэрээссийэ бара турар сириттэн кэллэ. Бүгүн Саха сирин үрдүнэн этиллэр алгыс Саха сирин байыастарын санааларын бөҕөргөтөрүгэр, кыайан, дойдуларыгар түргэнник кэлэллэригэр көмөлөстүн диэн баҕа санаатын эттэ.

“Бүгүн Арассыыйа судургута суох кэмнэргэ олорор. Мин Донбастан саҥа кэллим. Саха сирин байыастара бэйэлэрин эҕэрдэлэрин тиэрдэллэр. Бүгүн этиллэр алгыс тыллара кинилэргэ тиийдин, дойдуларыгар кыайыы көтөллөөх түргэнник эргилинниннэр”, — диэн кини бэлиэтээтэ.

Ыһыах аһыллыытын сиэрэ алгыстан саҕаланна. Ол кэнниттэн улуус хас биирдии нэһилиэгин бэрэстэбиитэллэрэ сэлэлии хаамтылар. Манна нэһилиэк баһылыктара, 100 учуутал уонна уһуйааччы, үлэ 100 бастыҥ үлэһитэ, тыа хаһаайыстыбатын 100 бастыҥ үлэһитэ, 100 уһулуччулаах спортсмен уонна успуорт бэтэрээнэ кытыннылар.

Ыһыаҕы театрализованнай көрдөрүү киэргэттэ. Бочуоттаах ыалдьыттар — Алдан улууһун бэрэстэбиитэллэрэ.

“Быйыл Мэҥэ Хаҥалас уонна Алдан улууһун доҕордоһууларын 55 сыла. Биһиги аҕаларбыт олус үтүө үгэһи олохтообуттар. Бу сылларга биһиги ситими тутан кэллибит. Биэс сыллааҕыта Алдаҥҥа ыытыллыбыт Олоҥхо ыһыаҕын кэнниттэн култуураҕа, социальнай эйгэҕэ өссө ыкса ситимнээхтик бииргэ үлэлэһэбит, улуустар икки ардыларынааҕы табаары эргиниибитин күүһүрдэбит. Үбүлүөйдээх тэрээһиннэр сылы эргиччи ыытыллаллар, ол эрээри, саамай сүрүнэ балаҕан ыйыгар Алдан куорат күнүгэр буолуоҕа”, — диэн Алдан улууһун баһылыга Александр Шестопалов эттэ.

Бырааһынньык үөрүүтүн куорат мээрин солбуйааччы Ли Юй Цзюнь баһылыктаах КНР-тан, Муданьзян бырааттыы куораттан кэлбит ыалдьыттар үллэһиннилэр. Тэрээһин аһыллыытын бүтүүтэ ыалдьыттар уонна кыттааччылар оһуохайдаатылар.

Бэлиэтээн эттэххэ, Мэҥэ Хаҥалас улууһун олохтоохторо биир дойдулаахтарынан, кинилэр үлэҕэ ситиһиилэринэн киэн тутталлар. Социальнай-экэнэмиичэскэй сайдыынан улуус илин эҥээрдэр ортолоругар инники күөҥҥэ сылдьар. Саха сиригэр тыа хаһаайыстыбатынан дьарыктанар, бааһыный хаһаайыстыбатын ахсаанынан лидер. Тыа хаһаайыстыбатынан дьарыктанар 2,5 тыһ. тахса тэрилтэлээх. Улуус биир ордук өрүтүнэн киэҥник сайдыбыт транспортнай-логистическай ситим буолар, манна тимир суол, өрүс терминала киирэллэр. Инникитин тустаах улууһунан Өлүөнэ өрүһү туоруур күргэ ааһыаҕа.

Ил Дархан уонна Бырабыыталыстыба пресс-сулууспата.