Айсен Николаев Мииринэйгэ оскуола иккис куорпуһун тутуутун көрдө

Ил Дархан Айсен Николаев Мииринэйгэ үлэтинэн сылдьан, 1 №-дээх орто оскуола иккис куорпуһун  тутуутун бэрэбиэркэлээтэ.

Тутуу иэнэ 878 кв. м. Бүгүҥҥү туругунан дьиэ таһын оҥороллор, баһаарынай кирилиэһи тутууга үлэ ыытыллар. Эбийиэк Мииринэй оройуонун уонна СӨ Үүнэр көлүөнэ тус сыаллаах пуондатын икки ардыларыгар сөбүлэһии иитинэн ыытыллар.

«Манна 1 №-дээх оскуолаҕа эбии тутууну ыытар туһунан уонна Мииринэй оройуоннааҕы киин балыыһатын саҥалыы уларытан оҥоруу туһунан быһаарыы ылыллыбыта. Сорук быһыытынан, сыл бастакы аҥаарыгар оскуола иккис куорпуһа тутуллуохтаах. Манна үөрэнэр сири таһынан, остолобуой, актовай уонна успуорт саалалара баар буолуохтара. Онон үөрэнэр, үлэлиир усулуобуйа тупсуо. Бу үөрэх хаачыстыбата үрдүүрүгэр төһүү буолуоҕа«, — диэн этэр Айсен Николаев.

Билиҥҥи туругунан 1 №-дээх оскуолаҕа 895  оҕо үөрэнэр.  «Үөрэх» национальнай бырайыак иитинэн, оскуолаҕа сыыппаранан үөрэтэр эйгэ, «Точка роста» аһыллыбыттар. Үөрэх кыһата «Школа за экологию: думать, исследовать, действовать» тиэмэнэн муниципальнай инновационнай былаһаакканан буолар. Маны сэргэ, оскуолаҕа мэдиссиинэ кылааһа баар. Химияны, биологияны дириҥэтэн үөрэтэллэр, мэдиссиинэ тиэмэтигэр анал куурустарга үөрэхтэр Дьокуускайдааҕы мэдиссиинэ кэллиэһин Мииринэйдээҕи филиалыгар уонна Мииринэй оройуонунааҕы киин балыыһаҕа ыытыллаллар. Оскуолаҕа байыаннай-патриотическай уонна успуорт кулууптара, театральнай устуудьуйа, экологическай-кыраайы үөрэтэр түмсүү, ырыа куруһуога, успуорт сиэксийэлэрэ үлэлииллэр.

Сиһилии манна https://www.sakha.gov.ru/news/front/view/id/3379792 ааҕыҥ.

СӨ Ил Дарханын уонна Бырабыыталыстыбатын пресс-сулууспата

Хаартыскаларга Дмитрий Ляшеев түһэриилэрэ