Хаартыска sakha.gov.ru ылылынна
Саха Өрөспүүбүлүкэтин Ил Дархана Айсен Николаев “Арассыыйа” пуорум-быыстапка кэмигэр Эрэгийиэн күнүн арыйыыга тымныытынан уонна алмааһынан аатырар бөдөҥ эрэгийиэн күн-түүн тупсарын уонна Арассыыйа Илин диэки култуураҕа уонна экэниэмикэҕэ туһаайыытын киининэн буоларын туһунан кэпсээтэ.
Айсен Николаев бэлиэтээбитин курдук, Саха сирэ ийэ дойдуга экэниэмикэ тирэҕин быһыытынан рекордка таҕыста. Ол курдук, өрөспүүбүлүкэ баалабай эрэгийиэннээҕи бородууктата 2018 сылтан икки төгүл улаатта – 900 млрдтан 2 трлн солкуобайга диэри. Биэс сыл устата экэниэмикэҕэ 2 трлн инвестицияны тарта. Бэһис сылын субуруччу кыһыл көмүһү, ньиэби, таас чоҕу уонна гааһы хостооһун муҥутуур үрдээтэ.
“Биһиэхэ тахсар сөҕүмэр уларыйыылар тустарынан этэрбэр, Саха сирин туһунан урукку өйдөбүлбүтүттэн олус ыраах барарбыт туһунан этэбин. Билигин биһиги билии экэниэмикэтигэр, киһи хапытаалын олоххо киллэрии үйэтигэр үктэннибит”, — диэтэ Айсен Николаев.
Кини этэринэн, бүгүн Саха сирэ дойду саамай “цифровой” уонна креативнай эрэгийиэнэ. Саха сирэ Уһук Илин ИТ-бородууксуйатын экспорын 90 бырыһыанын хааччыйар, өрөспүүбүлүкэ оонньуулары айан таһаарааччыларынан, геймдев-хампаанньаларынан аатырар.
Бүгүн Саха сирэ – Арассыыйаҕа киинэни оҥорууга столицалар кэннилэриттэн үһүс миэстэлээх.
Өрөспүүбүлүкэ экэниэмикэҕэ глобальнай хамсааһыннарга кыттар. Пекиҥҥэ “Один пояс – один путь” пуорумҥа Арассыыйа Бэрэсидьиэнэ норуоттар икки ардыларынааҕы тырааныспар саҥа көрүдүөрүн бэлиэтээбитэ, итилэртэн биирдэстэрэ – Саха сирэ АТР дойдуларын Хотугу муора суолун кытта холбуоҕа. 2028 сылга Өлүөнэни туоруур муоста тутуллуоҕа. Вантовай муоста уһуна 4,6 килэмиэтир. “Өлүөнэ муостата Арассыыйа сомоҕолоһуутун уонна модун кыаҕын бэлиэтинэн буолуо диэн эрэнэбин диир Саха сирин баһылыга.
Салгыы кини өрөспүүбүлүкэ бэйэтин сайдыытыгар култуураҕа тирэҕирэрин бэлиэтээтэ. “Арассыыйа саамай норуодунай эпоһа – саха норуотун Олоҥхото”, — диэтэ кини киэн тутта.
Өрөспүүбүлүкэтин билиһиннэрэригэр Айсен Николаев Саха сирин олохтоохторо дойдуларын таптыылларын уонна Арассыыйа норуоттарын сомоҕолоһууларын үгэстэриттэн туораабаттарын ыйда. “Саха сирэ түөрт үйэ тухары улуу Арассыыйаны кытта биир дьылҕалаах. Байыаннай эпэрээссийэ саҕаланыаҕыттан Саха сирин байыастара Ийэ дойдуларын көмүскүү туруммуттара. Саха сирин түөрт олохтооҕо – Александр Колесов, Алексей Неустроев, Филипп Евсеев уонна Дмитрий Егоров Арассыыйа Бэрэсидьиэнин Ыйааҕынан Арассыыйа Дьоруойа буоллулар.
Түмүккэ Саха сирин баһылыга бэлиэтээтэ: “Саха сирэ – тыһыынчанан сыллаах үтүө үгэстэри илдьэ сылдьааччы уонна ааспыты, билиҥҥи уонна кэлэр кэми түмээччи. Төрөөбүт дойдубут туһугар киэн туттуу, норуоппут туһугар барыбытын түмэр уонна Улуу Арассыыйабыт инникитигэр эрэли саҕар”.
Саха Өрөспүүбүлүкэтин Ил Дарханын уонна Саха Өрөспүүбүлүкэтин Бырабыыталыстыбатын пресс-сулууспата
Лев Павлов көҥүл тустууга юниордар истэригэр аан дойду чөмпүйэнээтигэр үрүҥ көмүс мэтээли ылары ситистэ. Кини…
Бүгүн, балаҕан ыйын 8 күнүгэр, Саха сирин соҕуруу, хотугулуу-илин, күнүс арҕаа улуустарыгар сорох сиринэн ардах,…
Бүгүн НТВ ханаал “Чудо” биэриитигэр Сунтаар улууһун Элгээйи орто оскуолатын үөрэнээччитэ, эдэр орнитолог, 11 саастаах…
Аҕыйах хонуктааҕыта Сунтаар улууһун Куокуну нэһилиэгэр Улахан Табаҕа киэҥ нэлэмэн, үрдүк үүнүүнү биэрэр бааһыната талах…
Оҕо барахсан хайа да кэмҥэ арахсыспат аргыһа – оонньуур буоллаҕа. Онон “Наука 0+” билим бэстибээлин…
Бу күннэргэ өрөспүүбүлүкэ улуустарыгар ититии сезона саҕаланан эрэр. Мэҥэ Хаҥалас улууһун пресс-сулууспата дьаһалта телеграм-ханаалыгар иһитиннэрбитинэн,…