Айсен Николаев: “Муус Устар” бэстибээли ыччат кэрэхсээтэ»

“Муус Устар” бэстибээл ыччат ортотугар олус биһирэнэрин туһунан “Быһаччы биэрии” эпииригэр өрөспүүбүлүкэ баһылыга Айсен Николаев иһитиннэрдэ.

Бу күннэргэ бэстибээл муниципальнай түһүмэҕэ ыытыллар, кулун тутар ортотугар түмүгэ тахсыаҕа.

““Муус Устар” бэстибээли ыччат олус кэрэхсиир, сылын ахсын олус тэнийэн иһэр”. Бэстибээл хайы-үйэ саҕаланна. Түмүктүүр түһүмэх Дьокуускайга кулун тутар 17-22 күннэригэр ыытыллыаҕа”, — диэтэ Айсен Николаев.

Кини этэринэн, кэнники сылларга патриотизмҥа, ыччаты гражданскай иитиигэ болҕомто ууруллар. Бу сырыыга бэстибээл кэнсиэпсийэтэ Кыайыы 80 сылыгар, Арассыыйаҕа Аҕа дойдуну көмүскээччи сылыгар туһуланна.

Өрөспүүбүлүкэ баһылыга быйыл бырагыраама кэҥээбитин, онно араас саҥа форматтар уонна жанрдар киирбиттэрин эттэ. Уопсайа 23 куонкурустаах уонна былаһааккалардаах  12 тематическай трек былааннанна.

“Бэстибээл үрдүк таһымнаахтык ааһыа диэн эрэнэбин. Былырыын оройуоннарга сүүмэрдээһиҥҥэ 8 тыһыынча кэриҥэ киһи кыттыбыта, кинилэртэн 2 тыһыынча киһи Дьокуускайга финалга кыттыбыта”, — диэтэ Айсен Николаев.

Былырыын бэстибээлгэ 4,5 тыһыынча киһи кыттыбыт диэн иһитиннэрдилэр.

Саха Өрөспүүбүлүкэтин Ил Дарханын уонна Бырабыыталыстыбатын пресс-сулууспата