Айсен Николаев Национальнай бэчээт күнүнэн эҕэрдэлиир!

Бэчээт уонна сонуну киэҥник тарҕатар сириэстибэлэр ытыктабыллаах үлэһиттэрэ уонна бэтэрээннэрэ!

Саха Өрөспүүбүлүкэтин салалтатын уонна тус бэйэм ааппыттан эһигини Национальнай бэчээт күнүнэн эҕэрдэлиибин!

Бу бырааһынньык элбэх омуктаах өрөспүүбүлүкэбит норуоттарын култуураларын уонна тылларын чөл хаалларар уонна сайыннарар инниттэн 2020 сыллаахха олохтоммута. 1907 сыллаахха от ыйын 1 күнүгэр Василий Васильевич Никифоров‑Күлүмнүүр көҕүлээһининэн «Саха дойдута» диэн хаһыат бастакы нүөмэрэ тахсан, Саха сирин суруналыыстыката сайдарыгар олук ууруллубута.

Бүгүн биһиги төрүт үгэспитин аныгы сыыппара технологияларын кытта дьүөрэлээн, бу дьыаланы эрэллээхтик салгыыбыт. Бүгүҥҥү туругунан эрэгийиэммитигэр сонуну киэҥник тарҕатар 202 сириэстибэ баара бэлиэтэнэр. «Саха Өрөспүүбүлүкэтин иһитиннэрэр уопсастыбатын сайыннарыы» диэн өрөспүүбүлүкэбит судаарыстыбаннай бырагыраамата сонуну киэҥник тарҕатар судаарыстыбаннай сириэстибэлэри хааччыйар, ону тэҥэ судаарыстыбаттан тутулуга суох сириэстибэлэргэ граннарынан уонна социальнай суолталаах бырайыактары оҥорон таһаарарга уонна тарҕатарга тус сыаллаах субсидияларынан өйөбүлү оҥорор.

Өрөспүүбүлүкэтээҕи, бары оройуоннааҕы хаһыаттар уонна сурунааллар уопсай тиражтара 53635 эксэмпилээргэ тэҥ. 34 оройуоннааҕы эрэдээксийэ үлэлиир. Кэмиттэн кэмигэр тахсар таһаарыылар өрөспүүбүлүкэ күннээҕи олоҕун бэчээккэ тиһэн, бүтүн култуурабыт, устуоруйабыт кэрэһитэ буолаллар.

Ону тэҥэ биһиги таһаарыыларбыт аныгы сыыппара кэмин кытта тэҥҥэ сайдаллар. Кэнники биэс сылга төрөөбүт төрүт тылларынан тахсар саайтар ахсааннара түөрт төгүл элбээтэ, урут 20 эбит буоллаҕына, билигин 84 саайт баар буолла. Бу көрдөрүү национальнай суруналыыстыка Куйаар ситимин ситиһиилээхтик баһылаабытын уонна дьон биһирэбилин ылбытын туоһулуур.

Дьон-сэргэ күннэтэ көрөр саайтарынан «Саха сирэ», «Эдэр саас», «Кыым», «УлусМедиа» буолаллар. Аҥаардас «Sakһa-sire.ru» саайты көрүү ахсаана 2024 сыллаахха ыйга мөлүйүөнтэн тахсыбыта бэлиэтэммитэ. «Медиалогия» диэн сонуну киэҥник тарҕатар сириэстибэлэри мониторинныыр хампаанньа чахчытынан, «ЯСИА» уонна «УлусМедиа» саайтар өрөспүүбүлүкэҕэ үгүстүк цитаталанар таһаарыыларынан буолаллар, итиэннэ бастакы уонна үһүс миэстэҕэ тураллар.

Сахалыы тахсар «Kerdee.ru» контены бэлиэтиир оруннаах. Бу сыыппара эйгэтигэр саха тылын туттууну кэҥэтэргэ, төрөөбүт тылынан тахсар саайтар ахсааннара эбиллэригэр олук буолар, элбэх матырыйаалы түмэр, наардыыр аныгы уонна олус туһалаах саайт.

Көрдөрөр-иһитиннэрэр медиаконтент эмиэ сайдар. Ол курдук, «Саха» национальнай көрдөрөр-иһитиннэрэр хампаанньа көрөөччү кэрэхсэбилин ылар теле-бырайыактары оҥорон таһаарар, 2024 сылтан саҕалаан «Тооку» оҕо аймах бастакы теле-ханаала үлэлии турар. Бу ханаал биир сылыгар түбэһиннэрэн «Айтал уонна Аптаах күүс» диэн бастакы толору метражтаах ойуулук өрөспүүбүлүкэ киинэ тыйаатырдарыгар көстүбүтэ кэрэхсэбиллээх буолла.

Ону таһынан, «Кэскил» оҕо бэчээтин кыһата «Аптаах тыл» диэн Бүтүн Арассыыйатааҕы оҕоҕо аналлаах сонуну киэҥник тарҕатар сириэстибэлэр куонкурустарыгар кыттан бастыҥ интэриниэт-таһаарыы уонна кыраайы үөрэтэр бастыҥ бырайыак диэн икки номинацияҕа кыайыыны ситиһэн, үлэтэ үрдүктүк сыаналаммытын бэлиэтиир тоҕоостоох.

Ураты махталбытын хорсун-хоодуот байыаннай кэрэспэдьиэннэрбитигэр тиэрдэбит. Кинилэр сырдатар кырдьыктаах уонна эрэли үөскэтэр матырыйаалларыттан инники кирбиигэ сылдьар Сахабыт сирин буойуннарын хорсун быһыыларын, кэхтибэт модун санааларын туһунан билэбит. Буойуннарга тиэрдиллэр бэчээппит уонна видеосюжеттарбыт төрөөбүт дойдуларын кытта ситимнииллэр, санааларын бөҕөргөтөллөр уонна кыайыыга эрэли саҕаллар.

Ытыктабыллаах суруналыыстар, бэчээт үлэһиттэрэ! Саха сирин суруналыыстыката урукку да өттүгэр, билигин даҕаны үрдүк таһымнаах, эппиэтинэстээх уонна дьон-сэргэ, Ийэ дойду дьылҕатыгар быһаччы оруоллаах эйгэнэн буолар. Уопсастыба өйүн-санаатын эһиги олохтуугут, култуура өйдөбүлүн харыстаан илдьэ сылдьаҕыт, төрөөбүт тылы сайыннараҕыт, уопсастыбаҕа чахчыны уонна кырдьыгы бигэргэтэҕит.

Идэҕитигэр бэриниигит, дьон туһугар ахсаабат кыһамньыгыт иһин махтанабын! Эһиэхэ уонна чугас дьоҥҥутугар чэгиэн доруобуйаны, өрө көтөҕүллүүнү, саҥа бырайыактары, эйэни, дьолу уонна этэҥҥэ буолууну баҕарабын!

Айсен Николаев, Саха Өрөспүүбүлүкэтин Ил Дархана.