Хаартыска: Андрей Сорокин, СИА.
Айсен Николаев Олоҥхо ыһыаҕар бэлэмнэниигэ уонна ыытыыга сүбэ мунньах ыытта. Өрөспүүбүлүкэ таһымнаах национальнай бырааһынньык Нерюнгри оройуонугар аан бастаан ыытыллар итиэннэ Нерюнгри 50 сылыгар аналлаах тэрээһиннэртэн биир сүрүннэрэ буолар.
Ил Дархан бэлэмнэнии үлэ үрдүк таһымҥа бара турарын бэлиэтээтэ уонна эбийиэктэри тутууга, кыттааччылар кэлиилэригэр-барыыларыгар, куттал суох буолуутун хааччыйыыга кэккэ сорудахтары биэртэлээтэ.
Сүрүн тэрээһиннэр “Амикан” пааркаҕа ыытыллыахтара, манна тупсарар үлэлэр Ил Дархан дьаһалынан бара тураллар.
Бырайыак быһыытынан рекреационнай кластер оҥоһуллуохтаах — уопсастыбаннай сири кэлимник сайыннаран баран, “Горизонт” хайыһардыыр баазаны кытта бииргэ холбуохтаахтар.
Ыһыах буолар сиригэр бырааһынньык церемониятын уонна сиэри-туому ыытар 16 эбийиэги оҥоро сылдьаллар. Бэлэмнэрэ 40%. Матырыйаалы барытын тутуу бара турар сиригэр тиэрдибиттэр.
Култуурунай бырагырааматыгар 1,5 тыһыынча киһи кыттыаҕа, ол иһигэр судаарыстыбаннай тыйаатырдар артыыстара, култуура, ускуустуба үөрэҕин кыһаларын устудьуоннара, бастыҥ самодеятельнай кэлэктииптэр, барыта 250 киһи. Ыһыах аһыллыытыгар, сабыллыытыгар, атын да тэрээһиннэргэ быдан дьыллартан билиҥҥи кэмҥэ диэри элбэх омук олохсуйан олорор сирин устуоруйата, үгэстэрэ көрдөрүллүөхтэрэ. Репетициялар бэс ыйын 24 күнүттэн саҕаланыахтара.
Олоҥхо ыһыаҕын бырагырааматыгар 70-тан тахса тэрээһин киирэ сылдьар. Тоҕус хайысханан 47 куонкурус ыытыллыа, олоҥхоҕо, нимнгакаҥҥа, нимканаҕа, оһуохайга, сахалыы фольклор көрүҥнэригэр — тойукка, дэгэрэҥҥэ, чабырҕахха, хомуска, кылыһах-кырыымпаҕа толорууга, хотугу аҕыйах ахсааннаах норуоттар фольклордарын жанрдарыгар, ол иһигэр “Девэйдэ” эргиир үҥкүүтүн киллэрэн туран.
Маны таһынан хотугу аҕыйах ахсааннаах норуоттар үгэскэ киирбит оҥоһуктарын оҥорор маастардарга, тимири уһаныыга, Саха сирин норуоттарын декоративнай-прикладной ускуустубаларыгар, таҥастарыгар куонкурустар буолуохтара.
Ыһыах кэмигэр испэктээкиллэри, быыстапкалары, болгуоттан тимири уһаарыыны, хомуһу күргүөм тардыыны, былыргы национальнай сиэрдэри-туомнары, аһаҕас халлаан анныгар сахалыы киинэлэри, айар кэлэктииптэр кэнсиэртэрин көрдөрүөхтэрэ.
Улуу Кыайыы сылыгар Олоҥхону Аҕа дойдуну көмүскээччилэр чиэстэригэр толоруохтара, 1944-1945 сс. Кыайыы ыһыахтарын туһунан матырыйааллары билиһиннэриэхтэрэ.
Олоҥхо ыһыаҕа 2025 сыл от ыйын 4-5 күннэригэр Нерюнгри оройуонугар ыытыллыахтара, диэн иһитиннэрэр СӨ Ил Дарханын уонна бырабыыталыстыбатын пресс-сулууспата.
Байыаннай дьайыы саҕаланыаҕыттан Мариуполь куоракка олорон биир дойдулаах байыастарбытыгар көмөлөһөр Мария Григорьевна Алексеева-Алгысчыт Арчыына Сахатын…
Бүгүн Дьокуускай куорат Н.О. Кривошапкин аатынан 5-с №-дээх орто оскуолатын иитэр үлэҕэ уонна оҕо уопсастыбаннай…
Ньурба улууһун олохтооҕо Гаврил Сидоров бэйэтин автосервиһыгар биир дойдулаахтарын массыыналарын өрөмүөннүүр. Байыаннай дьайыы кыттыылааҕа, бойобуой…
2024 сыллаахха Хатыыстыыр сэл. улаатан эрэр уол мототырааныспары ыытар бырааба суох сүүрдэ сылдьан, оҕону түҥнэри…
Үөһээ Бүлүү улууһун Мэйик нэһилиэгэр Өрөспүүбүлүкэ күнэ үрдүк тэрээһиннээхтик ааста. Нэһилиэк баһылыга Иван Яковлев салайааччылаах…
Мэҥэ Хаҥалас улууһун Гаврил Колесов аатынан Олонхо Дьиэтин үлэһитэ Анисия Степанова Узбекистан Өрөспүүбүлүкэтин Хива куоратыгар…