Айсен Николаев “Новые люди” фракция баһылыга Алексей Нечаевтыын көрүстэ

Саха сирин Ил Дархана Айсен Николаев Арассыыйа Судаарыстыбаннай Дууматыгар “Новые люди” баартыйа фракциятын баһылыга Алексей Нечаевтыын көрүстэ.

Көрсүһүүгэ эрэгийиэҥҥэ дьоҕус уонна орто урбаан, ону тэҥэ  туризм сайдыытын боппуруостарыгар ураты болҕомто уурулунна. Санаттахха, “Новые люди” баартыйа бэрэстэбиитэллэрэ Судаарыстыбаннай Дуума маныаха  сыһыаннаах кэмитиэттэрин салайаллар.

Көрсүһүү түмүгүнэн тас дойдулар ыҥырыыларыттан бары политическай күүстэр сомоҕолоһоллоро ордук суолталаах буолуохтааҕын бэлиэтээтилэр. Саха сирин уонна “Новые люди” хардарыта бииргэ үлэлээһиннэригэр Саха сирин уонна дойду бүттүүнүн чэчирии сайдыытыгар туһуламмыт үлэ-хамнас буолуохтаах, диэн Айсен Николаев бэлиэтээтэ. Алексей Нечаев этэринэн, бары дьүүллэһиллибит боппуруостарга хардарыта өйдөһүү уонна бииргэ үлэлииргэ бэлэм буолуу ситиһилиннэ.

Саха Өрөспүүбүлүкэтин Ил Дарханын уонна Саха Өрөспүүбүлүкэтин Бырабыыталыстыбатын пресс-сулууспата.