Айсен Николаев оҕолор Саҥа дьыллааҕы баҕа санааларын толордо

Ил Дархан Айсен Николаев «Үтүө санаа харыйата» аахсыйаҕа кыттан, коррекционнай оскуола оҕолорун Жанна Горохова уонна Эрсан Иванов баҕа санааларын толордо.

«Саҥа дьылы көрсө Дьокуускайга бэртээхэй үгэстээхпит: Ыччат лигата ыытар  «Үтүө санаа харыйа» аахсыйанан ким баҕарар Саҥа дьыллааҕы бэлэхтэри атыылаһан, коррекционнай оскуола оҕолоругар туттарыан сөп. Мин бу тэрээһиҥҥэ сыл аайы кэлэн, оҕолорго бэлэх оҥорорбун сөбүлүүбүн. Жаннаҕа уонна Эрсаҥҥа бэртээхэй роботтары атыыластым. Уонна түгэнинэн туһанан, бу күннэргэ бары үтүө дьыаланы оҥоруоҕуҥ диэн ыҥырабын: бэйэ-бэйэбитигэр, оҕолорбутугар бэлэх уунуохха, кинилэргэ анаан бырааһынньыгы тэрийиэххэ, олохторун өссө тупсарыахха, кэрэ, дьоллоох оҥоруохха”, — диэтэ Айсен Николаев.

«Үтүө санаа харыйата» аахсыйа 2015 сыллаахха Айсен Николаев куорат баһылыгынан үлэлии олорон көҕүлээбитэ. Аахсыйа быйыл ахсынньы 4-26 күннэригэр ыытылла турар.

Тэрийээччи – Ыччат лигата – быйыл доруобуйаларынан хааччахтаах оҕолорго ураты болҕомтотун туһаайбыт.

«Аахсыйаҕа тыһыынчаттан тахса оҕо кыттар — оскуола-интэринээт, адаптивнай кииннэр иитиллээччилэрэ уонна доруобуйаларынан хааччахтаах оҕолор. Кэлиҥҥи түөрт сылга аахсыйаны икки маҕаһыыҥҥа ыыппыт буоллахпытына, быйыл доруобуйаларынан хааччахтаах улаатан эрэр оҕолору туһунан туруордубут. Кинилэр аккырыыккалара “Ленские столбы” атыы-эргиэн киинигэр тураллар. Бу 16-тан 18 диэри саастаах оҕолор, кинилэр эмиэ Саҥа дьыллааҕы бэлэхтэри күүтэллэр, дьиктилэри итэҕэйэллэр,» – диэн кэпсээтэ «Ыччат лигата» АНО актыбыыһа Туяра Зверева.

Аахсыйа аккырыыккалара куорат устун хас да сиргэ бааллар. Кальвица уулуссатын 14/5 уонна Дзержинскэй уулуссатын 71 аадырыстарыгар баар «Бубль-Гум» маҕаһыыннарга, ону тэҥэ “Ленские столбы” универмагка (ЦУМ, 2 этээс) киирэн кыттыаххытын сөп. Кыттар буоллаххына, аккырыыкканы талан бэлэххин бэлэмниигин — атын ирдэбил суох. Бэлэхтэри барытын Саҥа дьылы көрсө оҕолорго түҥэтиэхтэрэ, диэн иһитиннэрэр Ил Дархан, бырабыыталыстыба пресс-сулууспата.