Айсен Николаев: «Ойуур баһаардарын ордук кутталлаах кэмигэр кэллибит»

 Ил Дархан Айсен Николаев «Якутия 24» телеханаал «Якутия вперед!» биэриитигэр кэлэн кэккэ ыйытыыларга хоруйдаата.

Биир сытыы ыйытыынан бүгүҥҥү күн тыҥааһыннаах кыһалҕатын – ойуур баһаардарын утары үлэ туһунан буолла.

“Баһаар ордук кутталлаах кэмигэр кэллибит. Бу кэлэр икки-үс нэдиэлэ быһаарыаҕа, бу сезону хайдах түмүктээх туоруурбутун. Бүгүҥҥү күҥҥэ уоту утары охсуһарга аналлаах бары тэрээһиннэр ыытыллан, дьон ох курдук оҥостон тураллар. Сотору ойуур уотун утары киирсэр бөлөхтөргө анаан анал тиэхиньикэни миэстэлэргэ хамсатыы саҕаланар. Уот турар түгэнигэр сып-сап умуруорар туһугар.

Билигин Саха сирин үрдүнэн 21 ойуур баһаара баара биллэр, уонун умуруора сылдьаллар, атыттара кэтэбилгэ тураллар – уустук сиргэ, хайа үрдүгэр бааллар. Онон балаһыанньаны көрөн быһаарыы ылабыт”, — диэн эттэ Айсен Николаев.