Айсен Николаев олохтоох салайыныы сэбиэтин мунньаҕын ыытта

Олохтоох салайыныы сэбиэтин мунньаҕар Айсен Николаев судаарыстыбаннай салайыы туһунан саҥа ыйааҕын олоххо киллэриини быһаарда.

Быһата, салайыы саҥа култууратыгар ыҥырда.
«Салайыы хаачыстыбатын тупсарыы биһиги иннибитигэр турар уустук соруктары кытта ситимнээх. Былаас уорганнара саҥа таһымҥа тахсыахтаахтар», — диэтэ Саха сирин баһылыга.
Айсен Николаев салайыы култуурата наадатын ыйда.
«Мин стратегическай ыйаахтарбын олоххо киллэрэргэ муниципальнай салайар хамаандалар тэриллибиттэрэ. Ол эрээри итилэр оройуоннар баһылыктара хонтуруола уонна кыттыыта суох үксүгэр үлэлээбэттэр. Ону олох төрдүттэн уларытыахха. Эһигиттэн хас биирдиигит салайааччы эрэ буолбакка, хамаандатын ситиһиигэ сирдиир стратег буолуохтаах»,— диэтэ кини.
Оройуон уонна куорат уокуруктарын баһылыктарыгар дойду бүддьүөтүн сокуоннаһын уонна муниципальнай быраап аакталарын сөп түбэсиһиннэрэргэ ыйылынна. Ону тэҥэ үбү көдьүүстээхтик туһаныы хонтуруолланыахтаах.
Санаттахха, судаарыстыбаннай салалта туһунан стратегическай ыйааҕы Ил Дархан быйыл атырдьах ыйыгар таһаарбыта.
Судаарыстыбаннай уорганнар иннилэригэр турар соруктартан биирдэстэрэ — салайыы саҥа култууратыгар көһүү, судаарыстыбаннай сектор оҥорон таһаарыытын ситимин үрдэтии.

Саха Өрөспүүбүлүкэтин Ил Дарханын уонна Саха Өрөспүүбүлүкэтин Бырабыыталыстыбатын пресс-сулууспата