Айсен Николаев Олохтоох салайыныыны сайыннарыы Ассоциациятын Үрдүкү Сэбиэтигэр талылынна

СӨ Ил Дархана Айсен Николаев Олохтоох салайыныыны сайыннарыы Бүтүн Арассыыйатааҕы Ассоциациятын (ВАРМСУ) VIII сийиэһигэр Үрдүкү Сэбиэт чилиэнинэн талылынна.

Кини кандидатурата муниципалитет баһылыктарын кытта ситиһиилээхтик үлэлэһэр уопутун, олохтоох салайыныы боппуруостарын дириҥник өйдүүрүн уонна өрөспүүбүлүкэҕэ туһалааҕын дакаастаабыт көдьүүстээх быраактыкалары киллэрбитин учуоттаан бигэргэммитэ бэлиэтэммит.

«Айсен Николаев ВАРМСУ Үрдүкү Сэбиэтигэр талыллыбыта – өрөспүүбүлүкэ олохтоох салайыныы систиэмэтин бииргэ үлэлээһин уонна уопсай эппиэтинэс бириинсиптэригэр олоҕуран, сөптөөх хайысханан сайдан иһэрин туоһута. Бу миэстэтигэр соруктары туруоран үлэлиирбит түмүгэ», – диэн Саха Өрөспүүбүлүкэтин муниципальнай тэриллиилэрин Сэбиэтигэр бэлиэтээтилэр.

ВАРМСУ Үрдүкү Сэбиэтин састаабыгар араас эрэгийиэннэр уонна судаарыстыбаннай салайыы эйгэтин бэрэстэбиитэллэрэ киирдилэр. Бу сүрүн уорган суолтата улахан. Олохтоох салайыныыны сайыннарыы Бүтүн Арассыыйатааҕы Ассоциациятын VIII сийиэһэ «Кыра дойду улахан быһаарыылара» диэн муниципальнай быраактыкалар пуорумнарын чэрчитинэн ыытылынна. Сийиэскэ ВАРМСУ стратегическай хайысхаларын уонна үлэтин сүрүннүүр сыалтан 2026 сылга диэри үлэтин сүрүн хайысхалара бигэргэннилэр.

Кэлэр кэмҥэ сүрүн соруктарынан ананнылар:

1. Олохтоох салайыныыны сайыннарыы уонна хардарыта үлэни бөҕөргөтүү. Муниципалитеттар, кинилэр сэбиэттэрин уонна идэлээх тэрилтэлэрин икки ардыларыгар көдьүүстээх үлэни тэрийиигэ, күүһү түмүүгэ, уопсай интэриэһи көмүскээһиҥҥэ уонна норуоттар икки ардыларынааҕы сибээһи олохтооһуҥҥа болҕомто ууруллуоҕа.

2. Уопсастыбаннай сөбүлэһиини бөҕөргөтүү. Арассыыйа нациятын сомоҕолоһуутун бөҕөргөтүүгэ, омуктар уонна итэҕэллэр икки ардыларынааҕы эйэни хааччыйыыга, этнокултуурунай эгэлгэни өйөөһүҥҥэ үлэ салҕаныаҕа.

3. Олохтоох салайыныы туругун эрэгийиэннэргэ куруук кэтээн көрүү. Бу үлэ түмүгүнэн РФ Бырабыыталыстыбатыгар сыл аайы олохтоох салайыныы эйгэтигэр баар тосхоллор тустарынан аналитическай дакылаат киллэриллэн иһиэҕэ.

4. Муниципальнай сулууспа престиһын үрдэтии. Олохтоох салайыныы уорганнарын уонна муниципальнай сулууспалаахтар үлэлэрин киэҥник тарҕатыы сүрүн хайысха буолуоҕа.