Хаартыска: SakhaGov
Нерюнгри улууһугар Саха сирин соҕуруу киин куората 50 сылыгар анаммыт Олоҥхо ыһыаҕа ыытылла турар. Өрөспүүбүлүкэ бырааһынньыга Саха сирин бары олохтоохторун түмэр. Ол туһунан эрэгийиэн баһылыга суруналыыстары кытары кэпсэтэригэр эттэ.
«Олоҥхо Ыһыаҕа — Саха сирин бары олохтоохторун түмэр уопсай национальнай бырааһынньыкпыт. Былыргы үйэлэртэн кэлбит бырааһынньык биир норуот үгэһэ эрэ буолбакка, норуот бүттүүнүн үөрүүтүнэн буолла. Ол ураты күүһэ көлүөнэттэн көлүөнэҕэ бэриллэр сыаннастарга сытар. Чуолаан Олоҥхоҕо биһиги харыстабыллаахтык сыһыаннаһар духуобунай култуурабыт бастыҥ өрүттэрэ көстөллөр”, — диэтэ Айсен Николаев.
Ил Дархан Олоҥхо ыһыаҕа ыытыллар Таастаах диэн сири үрдүктүк сыаналаата. Манна барыта 16 эбийиэк тутулунна, ол иһигэр оҕо оонньуур куората уонна успуорт былаһааккалара саҥардылыннылар, Чульман өрүскэ сынньанар былаһааккалар оҥоһулуннулар, суоллар, аһаҕас халлаан анныгар баар пааркаҕа тиэхиньикэлэр саҥардылыннылар.
“Нерюнгри олохтоохторугар уонна маннык үчүгэй бырааһынньыгы тэрийээччилэргэ улахан махталбын этиэхпин баҕарабын. Хаһан эрэ биһиги улуус баһылыга Роман Михайлович Щегельняктыын манна, кураанах былаһааккаҕа турбуппут. Оччолорго маннык кыраһыабай көстүү баар буолуо диэн саныырга ыарахан курдуга. Бары хамаандалар күүстэринэн уонна кыһамньыларынан маннык үчүгэй сир-уот баар буолла. Тутуу барыта олохтоохторго уонна Нерюнгри ыалдьыттарыгар өр сылларга сулууспалыырыгар уонна биир үчүгэй сынньанар сиринэн буолуоҕар эрэнэбин. Чуолаан маннык түгэннэр көмөлөрүнэн Саха сирин элбэх омуктаах норуота биир сомоҕо буоларыгар эрэнэбин”, — диэн Айсен Николаев бэлиэтээн эттэ.
Олоҥхо ыһыаҕын бырагырааматынан, быйыл 70-тан тахса тэрээһин буолуохтаах. Олор ортолоругар тоҕус хайысхаҕа 47 куонкурус баар.
Ыһыаҕы үөрүүлээхтик арыйыыга уонна сабыыга 1,5 тыһыынчаттан тахса киһи, ол иһигэр судаарыстыбаннай тыйаатырдар 250 артыыстара уонна үрдүк үөрэх кыһаларын устудьуоннара бааллар. Ону таһынан өрөспүүбүлүкэҕэ олорон норуоттар ассамблеяларын 17 этническэй общината кыттар.
Өрөспүүбүлүкэтээҕи XVIII Олоҥхо ыһыаҕа Нерюнгри улууһугар от ыйын 3-5 күннэригэр “Таастаах” диэн кэрэ көстүүлээх сиргэ ыытыллар уонна өрөспүүбүлүкэ соҕуруу киин куората 50, Аҕа дойду Улуу сэриитигэр Кыайыы 80, уһулуччулаах судаарыстыбаннай уонна бэлитиичэскэй диэйэтэл Гавриил Чиряев төрөөбүтэ 100 сылларыгар ананар.
Олоҥхо ыһыаҕа өрөспүүбүлүкэҕэ 2006 сылтан араас улуустарга буолла, 2026 сылга Кэбээйи улууһугар ыытыллыаҕа.
СӨ Ил Дарханын уонна бырабыыталыстыбатын пресс-сулууспата
«Дальний Восток – Земля приключений» куонкуруска “Тропами Победы” (“Кыайыы ыллыгынан”) диэн саҥа номинация баар буолла.…
Саха сиринээҕи ИДьМ наркотигы хонтуруоллуур отделын үлэһиттэрэ бобуулаах веществолары сокуона суох тарҕатыыга уорбаланар 30 саастаах…
Леонид Попов аатынан Сунтаар улуустааҕы библиотекатын айымньылаах үлэтин биир бэлиэ көстүүтүнэн үгэс курдук ыытыллар “Сунтаар…
Өрөспүүбүлүкэтээҕи Олоҥхо ыһыаҕын сүрүн түгэннэриттэн биирдэстэринэн «Батыйа - эр хоһуун санаа уонна үрдүк таһым бэлиэтэ»…
Нерюнгригэ Олоҥхо ыһыаҕар түөрт сыллааҕыта Үөһээ Бүлүүгэ саҕаламмыт «Олоҥхону ааҕабыт» бырайыак салҕанна. Үгэс курдук, бырайыагы…
Саха сиригэр 1 тииптээх саахарынай диабеттаах 2-17 саастаах оҕолор сыл бастакы аҥаарыгар глюкоза тиһигин быспат…