Айсен Николаев оҥоһуу өйү кытта үлэлиир учуонайдары, хамаандалары, оҥорон таһаарааччылары кытта көрүстэ

Бүгүн, олунньу 5 күнүгэр, Ил Дархан Айсен Николаев Саха сиригэр оҥоһуу өйү кытта үлэлиир учуонайдары, хамаандалары, оҥорон таһаарааччылары кытта көрүстэ. Бу туһунан кини телеграм-ханаалыгар иһитиннэрдэ.

«Биһиги өрөспүүбүлүкэбитигэр аныгы технологиялары туһаныы уонна элбэтэргэ өссө тугу гыныахтаахпытын туһунан кэпсэттибит. Саха сирэ оҥоһуу өй эйгэтигэр көхтөөхтүк сайдан иһэрэ ситиһиилэрдээхпититтэн көстөр. Ааспыт сылга өрөспүүбүлүкэ «Лидеры искусственного интеллекта» бириэмийэ лиидэринэн буолбута. Дойду үрдүнэн 106 бырайыактан Саха сиригэр оҥоһуллубут 12 бырайыагы талбыттара. Бу биһиэхэ күүстээх хамаандалар үлэлииллэрин, туһаны аҕалалларын бэлиэтиир. Ахсынньыга өрөспүүбүлүкэ баһылыгын иһинэн Оҥоһуу өй сэбиэтэ тэриллибитэ, оттон билигин 2035 сылга диэри Саха сиригэр оҥоһуу өй сайдыытын стратегиятын толкуйдуу сылдьабыт», — диэн Ил Дархан көрсүһүү кэнниттэн санаатын суруйар.