Айсен Николаев Орто Халымаҕа байыас дьонугар сырытта

Ил Дархан Айсен Николаев Орто Халымаҕа оробуочай сырыытыгар, Налимскайтан барбыт байыас Андрей Семенович дьонун кытары көрүстэ.

Андрей Семенович хантараагынан барбыт байыаннай сулууспалаах. Ийэтэ Светлана Семеновна хайдах-туох олороллорун, икки оҕото аҕалара уоппускаҕа кэлэрин кэтэһэллэрин кэпсээтэ.

«Уолум сибээһи төһө кыалларынан тутар. Миэхэ барыта этэҥҥэ буолуо, дьиэбэр тиийиэм диэн куруук этэр. Андрей барарыгар бойобуой үөрүйэхтэри билэрин, Ийэ дойдутун көмүскүү хайаан да барыахтааҕын эппитэ«, — диир Светлана Семеновна.

Кини волонтердар көмөлөһөллөрүн бэлиэтиир. «Оройуоммутугар волонтердар күүстээх хамсааһыннара тэриллибитэ. Ону сэргэ, оройуоммут уонна куораппыт салалталара көмөлөһөр, өйүүр. Төлөбүрдэри туппуппут«, — диэн этэр кини.

Айсен Николаев Светлана Семеновна сотору 70 сааһын туолуохтааҕын, онон харах бырааһыгар сылдьара хайаан да наадалааҕын уонна уопсайынан доруобуйатын көрдөрөрүгэр, ону сэргэ  байыас дьиэ кэргэнигэр улуус салалтата көмөлөһөллөрүгэр, тирэх буоларыгар көрдөстө.

«Уолгут эһиги тускутугар наһаа  долгуйбатын, эһигини өйүөхпүт«, — диэтэ Ил Дархан.

СӨ Ил Дарханын уонна Бырабыыталыстыбатын пресс-сулууспата