Хаартыска sakha.gov.ru
Москваҕа Арассыыйа Федерациятын Судаарыстыбаннай сэбиэтин «Энергетика» салаатыгар хамыыһыйа мунньаҕа буолла. Мунньаҕы хамыыһыйа салайааччыта – Саха Өрөспүүбүлүкэтин Ил Дархана Айсен Николаев ыытта.
Мунньахха федеральнай былаас уорганнарын, эспиэрдэр түмсүүлэрин уонна саамай улахан энергетическэй, бырамыысыланнас хампаанньалар бэрэстэбиитэллэрэ муһуннулар. Сүрүн дьүүллэһии тиэмэтинэн чоҕунан үлэлиир электро-ыстаансыйалар тобохторун бырамыысыланнай эргитиигэ киллэриини судаарыстыба бэрээдэктээһинин тупсарыы буолла.
«Арассыыйа Бэрэсидьиэнэ Владимир Путин судаарыстыба сабыылаах экэниэмикэни үөскэтиини биир төрүт соругунан быһаарбыта. 2030 сылга диэри 25 бырыһыаныттан итэҕэһэ суох, оҥорон таһаарыы уонна туһаныы хаһаайыстыба эргииригэр киириэхтээх. Дойдуга мунньуллубут күл-буор кээмэйэ 1,5 миллиард туоннаҕа сыаналанар уонна 28 тыһыынчаттан тахса гектар иэннээх сири ылар. Сыл ахсын 18 мөлүйүөн туонна кэриҥэ күл-буор тобоҕо үөскүүр», – диэн хамыыһыйа бэрэссэдээтэлэ бэлиэтээтэ.
Кини бу кыһалҕаны быһаарарга 2022 сыллаахха Күл-буор бөҕүн туһаныы кээмэйин улаатыннарар кэлим былаан ылыллыбытын, 2024 сылга онно уларытыылар киирбиттэрин санатта. Бүгүн дойду 18 эрэгийиэнигэр бэйэлэрин бырагыраамалара бигэргэннилэр. Ол иһигэр Саха сиригэр маннык бырагыраама быйыл кулун тутар ыйга ылыллыбыта. Айсен Николаев этэринэн, өрөспүүбүлүкэҕэ күл-буор тобоҕун уопсай кээмэйэ 15 мөлүйүөн туонна кэриҥэ, онтон 90%-на Нерюнгри уокуругар баар, ону тиэйэн таһыы ырааҕынан көдьүүһү хааччахтыыр.
«Сибиир күүһэ» магистральнай гаас турбатын тутуу кэмигэр, Нерюнгри ГРЭС-н күл-буора туһанныллыбыта. Күл сороҕо бетон бородууксуйатын оҥорууга эмиэ туттуллар. Инникитин Нерюнгри ГРЭС-гэр күл-буору переработкалыыр модульнай комплексы туруорар кыах баар. Билиҥҥитэ «Русатом инфраструктурные решения» АУо кытары кинилэр уопуттарын туһанарга үлэлэһэбит», — диэн Ил Дархан эттэ.
Мунньахха энергетика, айылҕа баайын, бырамыысыланнас уонна атыы-эргиэн, тутуу уонна дьиэ-уот хаһаайыстыбатын, тырааныспар миниистирдэрин солбуйааччылара, ону таһынан Росстандарт баһылыга уонна Сырьену иккистээн туһаныыны сайыннарыы национальнай ассоциациятын салайааччыта тыл эттилэр. Арассыыйа саамай бөдөҥ хампаанньалара, ол иһигэр «РусГидро», «Сибирская генерирующая компания», «Интер РАО», «Эн+ Груп», «Росатом Инфраструктурные решения», күл-буору туһаҕа таһаарар үлэлэрин кэпсээтилэр.
Сиһилии бу сигэнэн киирэн ааҕыҥ: https://www.sakha.gov.ru/news/8354
Ааспыт сууккаҕа ЫБММ үэһиттэрэ суол саахалыгар ыҥырыллыбатылар. Техногеннай биэс баһаар бэлиэтэммит, эмсэҕэлээччи да, өлөөччү да…
ГПХ-нан уонна дуогабарынан үлэ туох уратылаахтарын, кимнээх маннык үлэлиэхтэрин сөбүн туһунан Объясняем.рф телеграм-ханаал иһитиннэрэр. [gallery…
Бүгүн, ахсынньы 10 күнүгэр, Саха сирин сорох улуустарыгар -49 кыраадыс буолара күүтүллэр диэн УГМС иһитиннэрэр.…
Саха сиригэр 9514 оҕо төрөөтө. Саха Өрөспүүбүлүкэтэ 2014 сылтан нэһилиэнньэ ахсаана үрдүү турар Уһук Илин…
Саха сирэ хорсун-хоодуот дьонунан аатырар. Саха сирэ бэйэтин устуоруйатыгар элбэх дьоруойу бэлэхтээбитэ, олор истэригэр Аҕа…
Хата бу бэрт этии буолбут. Билигин киһиэхэ ханнык битэмиин тиийбэтин бэрэбиэркэлэтээри дьон хастыы да тыһыынчаны…