Айсен Николаев РФ миниистирэ Александр Козлову кытары көрүстэ

Кэпсэтии кэмигэр Ил Дархан Саха сирэ  алмааһы, таас чоҕу, кыһыл көмүһү, үрүҥ көмүһү,  сурьманы уонна  углеводородтары хостооһуҥҥа Арассыыйаҕа инники күөҥҥэ сылдьарын эттэ.  2022 сылга бырамыысыланнай оҥорон таһаарыы  индексэ  110,1% буолан, өрөспүүбүлүкэ бу көрдөрүүнэн РФ субъектарын иһигэр ахсыс миэстэҕэ тахсыбыт.

Туһалаах баай-дуол саппааһын  хаҥатыыга уонна бырамыысыланнаһы күүскэ сайыннарыыга, өрөспүүбүлүкэ минеральнай-сырьевой базаны  улаатыннарыыга пилотнай эрэгийиэн буоларга этии киллэрбит.   Үбүлээһин кээмэйэ улаатыыта эрэгийиэҥҥэ саҥа кэскиллээх былаһааккалар тустарынан чахчылары үөрэтиигэ, булууга төһүү күүһүнэн буолуоҕа.  2022 сыл түмүгүнэн, Саха сирин  геологоразведкатыгар 50 млрд  солк. угуллубут.

Маны таһынан Айсен Николаев уонна  Александр Козлов баһаар сезонугар бэлэмнэнии туһунан кэпсэттилэр. Өрөспүүбүлүкэ баһылыга  үбүлээһин кээмэйэ улаатан, иллэрээ сыллааҕыны кытары тэҥнээтэххэ, былырыын ойуур баһаардарын кээмэйэ  14 төгүл намтаабытын бэлиэтээтэ.

2023 сылга ойууру харыстааһыҥҥа  федеральнай бүддьүөттэн субвенция кээмэйэ 2022 сыллааҕы туругунан хаалбыт.   Авиационнай кэтээн көрүүгэ хантараактар түһэрсиллибиттэр. Билиҥҥитэ 260 тиэхиньикэ бэлэм турар.  Өрөспүүбүлүкэ бары оройуоннарыгар баһаарынай сулууспа штаты таһынан бөлөхтөр тэриллибиттэрин Ил Дархан иһитиннэрдэ.