Айсен Николаев: “Саха сирэ, инниҥ диэки!” каадыр куонкуруһа өрөспүүбүлүкэ салайар хамаандатын тэрийэргэ көмөлөһөр

Ханнык баҕарар уопсастыбаны хамсатар күүһүнэн – дьон, кинилэр идеялара уонна норуоттарын туһугар үлэлиир баҕа санаалара буолар. Саха сиригэр талааннаах дьон элбэх, биһиги сүрүн сорукпут – кинилэр сайдар кыахтарыгар усулуобуйаны тэрийии.

Бүгүн Ил Дархан Айсен Николаев өрөспүүбүлүкэ салайар хамаандатын тэрийэргэ көмө буолар “Саха сирэ, инниҥ диэки!” каадыр куонкурсугар кыттарга ыҥырыы таһаарда.

«Биһиги Арассыыйа Бэрэсидьиэнэ Владимир Путин көҕүлээһинин – “Каадырдар” национальнай бырайыагы ис сүрэхпититтэн өйүүбүт, бу бырайыак, Арассыыйа экэниэмикэтигэр үрдүк таһымнаах исписэлиистэри бэлэмнээһиҥҥэ туһуланар. Оттон «Саха сирэ, инниҥ диэки!» каадыр куонкурса хас биирдии кыттааччыга бэйэтин холонон көрөрүгэр уонна тус уонна профессиональнай өттүнэн сайдарыгар кыаҕы биэрэр. Куонкурус уһун болдьохтоох каадыр стратегиятын дьоһуннаах түһүмэҕинэн буолар уонна өрөспүүбүлүкэ күүстээх салайар хамаандатын тэрийэргэ көмөлөһөр. Куонкурус түмүгүнэн бастыҥнарынан билиниллибит 25 кыттааччы салайар каадыр солбугар киириэхтэрэ», — диэн Айсен Николаев этэр.

Ил Дархан төрөөбүт өрөспүүбүлүкэбит туһугар үлэлиир-хамсыыр кыахтаах, баҕалаах дьоҥҥо тоһоҕолоон эттэ: «Өскөтүн эһиги төрөөбүт өрөспүүбүлүкэҕитигэр сөптөөх олох усулуобуйатын тэрийэргэ, туох баар күүскүтүн-уоххутун биэрэн туран үлэлииргэ бэлэм, дьону угуйар, түмэр, салайар кыахтаах буоллаххытына – кыттыҥ!».

Куонкуруска кыттарга сайаапкалары 2024 с. атырдьах ыйын 1-31 күнүгэр диэри Якутиявперед.рф сигэнэн биэриэххитин сөп.