Айсен Николаев: Саха сирэ көҥүл тустууга үрдүк таһымнаах турнирдары салгыа

Олимпийскай чөмпүйүөн Роман Дмитриев сырдык аатыгар анаммыт норуоттар икки ардыларынааҕы көҥүл тустууга турнир Дьокуускайга өрө көтөҕүллүүлээхтик ыытылла турар.

Аны биир ыйынан Сахабыт сирин киин куоратыгар ыччаттарга көҥүл тустууга Арассыыйаҕа бастыыр иһин күрэхтэһии буолуоҕа. Күһүн Дмитрий Коркин кэриэһигэр турнир күүтүллэр.
Ил Дархан Айсен Николаев Роман Дмитриев сырдык аатыгар анаммыт норуоттар икки ардыларынааҕы турнир көҥүл тустууга кыттыылаахтарын уонна тэрийээччилэрин кытары көрүстэ.

Айсен Николаев түһүлгэ кыттыылаахтарын кытары сэһэргэһэригэр, успуорт, Роман Дмитриев кэриэһигэр турнир араас дойду спортсменнарын бииргэ түмэрин бэлиэтээтэ.

«Бу судургута суох кэмҥэ Арассыыйа эрэгийиэннэриттэн, 13 араас дойдуттан Саха сиригэр кэлбиккитигэр улаханнык махтанабын. Бу успуорт эйэни түстүүрүн көрдөрөр. Аан дойду спортсменнара бары доҕордуу, бырааттыы истиҥ сыһыаннаахтарыгар, тустууктар —  ханнык баҕарар түгэҥҥэ мэлдьи уопсай тылы булар уратылаахтарыгар уонна кинилэр куруук бииргэ буолалларыгар эрэнэбин. Дьокуускай, Арассыыйаҕа, аан дойдуга тустууга күрэстэр ыытыллар киин куораттарыттан биирдэстэринэн буоларынан, турнирдары үрдүк таһымҥа ыытыы салҕаныа«, — диэтэ Ил Дархан мустубут ыалдьыттарга, спортсменнарга.

«Кэлэр сылга биһиги киэн туттар ааттыыр, сүгүрүйэр улуу спортсмеммыт Роман Дмитриев төрөөбүтэ 75 сылын бэлиэтиэхпит. Үбүлүөйдээх тэрээһиннэр былааннара бигэргэтиллибитэ. Роман Михайлович төрөөбүт дойдутугар кини аатынан успуорт комплекса үлэҕэ киириэ. Өрөспүүбүлүкэ киин куоратыгар биэрэк үрдүнэн баар Роман Дмитриев аатын сүгэр уулусса быйылгыттан саҥардыллан оҥоһулларыгар быһаарыы ылылынна. Бу Дьокуускай биир кэрэ миэстэтинэн буолуоҕа. Олимпийскай чөмпүйүөн сырдык аатын үйэтитиигэ турнир салҕаныа, онно аан дойдуттан өссө элбэх чулуу спортсменнар түмсэн иһиэхтэрэ«, — диэтэ кини.

Көрсүһүүгэ кыттыыны ылбыт ыалдьыттар Саха сиригэр үрдүк таһымнаах тэрээһин тэриллибитигэр махтаннылар. Иран, Монголия, Греция, Индия, Саха сирин хамаандаларын бэрэстэбиитэллэрэ бу аан дойду таһымнаах күрэхтэһии буоларын бэлиэтээтилэр.

«Эһиэхэ 13 араас дойдуттан тустууктар түмүстүлэр, бу турнир олус наадалааҕын, кэтэһэллэрин туоһулуур. Роман Дмитриев сырдык аатыгар анаммыт норуоттар икки ардыларынааҕы көҥүл тустууга күрэхтэһии сайдан уонна иннин диэки дьулурҕатык баран иһэр. Ил Дархан Айсен Николаев өйөбүлүнэн Саха сиригэр спортивнай хамсааһыҥҥа күүстээх хамаандалааххыт. Маннык өйөбүллээх буоларгытынан, эһиэхэ саҥа бирилийээннэр — Олимпийскай чөмпүйүөннэр үүнэн-сайдан тахсалларыгар эрэнэбин«, — диэн  РФ спортивнай тустууга Федерациятын толорооччу дириэктэрэ Роман Гайдуков эрэнэрин биллэрдэ.

Кыргыттарга көҥүл тустууга Арассыыйа сүүмэрдэммит хамаандатын ыстаарсай тириэньэрэ Алена Карташова, бу турнир эдэр спортсменнарга олус үчүгэй тирэх буоларын этэр.

«Бу улахан турнир. Көҥүл тустууга Европа чөмпүйэнээтигэр спортсменнары сүүмэрдиир аренанан буолуон сөп«, — диир кини.

Антонина Дмитриева дьиэ кэргэн аатыттан Роман Дмитриев аатын өйдүү-саныы сылдьарга, үйэтитэргэ үлэ тиһиктээхтик ыытылларыгар өрөспүүбүлүкэ салалтатыгар махтанна. Итиэннэ спортсмен олоҕун, успуорка ситиһиитин туһунан уус-уран киинэни устарга этии киллэрдэ.

«Бу ыччакка чаҕылхай холобуру көрдөрүө, чөмпүйүөн буола үүнэн-сайдан тахсалларыгар сирдиэҕэ, успуорду сайыннарарга, тарҕатарга көмө, тирэх буолуоҕа. Сценарий бэлэмнэниллибитэ. Режиссер Никита Аржаков үлэҕэ ылсарга бэлэм«, — диэтэ Антонина Дмитриева.

Көрсүһүү түмүгэр, Ил Дархан далааһыннаах түһүлгэ кыттыылаахтарыгар махтанна. Кини номох буолбут спортсмен, аар-саарга аатырбыт тустуук туһунан өйдүү-саныы сылдьарга өрөспүүбүлүкэ салалтата бары кыһамньытын, болҕомтотун ууруоҕа диэн эрэннэрдэ. Маны сэргэ, Саха сирин чулуу уола Роман Дмитриев олоҕун анаабыт дьыалата салҕаныаҕын эттэ.

Олимпийскай чөмпүйүөн Роман Дмитриев сырдык аатыгар норуоттар икки ардыларынааҕы көҥүл тустууга  күрэхтэһиигэ 13 дойдуттан 2003-2005 с.т. 300-тэн тахса бастыҥ спортсмен кыттар. Көбүөргэ Азербайджан, Армения, Греция, Индия, Белоруссия, Иран, Казахстан, Кыргызстан, Монголия, Узбекистан, Таджикистан, маны сэргэ, Арассыыйа 27 эрэгийиэниттэн, ол иһигэр дойду юниордарга сүүмэрдиир хамаандатын киллэрэн туран, кэскиллээх, бастыҥ тустууктар илин-кэлин түсүһэ, күүстэрин холоһо тахсаллар.

Турнир ыытыллыбытын уон сыл устатыгар, күрэхтэһии историятыгар аан бастаан Арассыыйаттан 83 кыыс Азербайджантан, Узбекистантан, Кыргызстантан, Монголияттан, Грецияттан кыттар.

СӨ Ил Дарханын уонна Бырабыыталыстыбатын пресс-сулууспата