Айсен Николаев Саха сирэ РНА Сибиирдээҕи салаатын кытта бииргэ үлэлээһин таһымын үрдүктүк сыаналаата

Саха сирин баһылыга Айсен Николаев сэтинньи 27 күнүгэр Арассыыйа Наукаларын академиятын академигын, вице-бэрэсидьиэнин, Сибиирдээҕи салаатын бэрэссэдээтэлэ Валентин Пармоновы кытта көрүстэ.

“РНА Сибиирдээҕи салаатын научнай айан таһаарыылара, уруккуттан бииргэ үлэлиирбит өрөспүүбүлүкэҕэ улахан суолталаахтар. Балар экэниэмикэ үгүс хайысхаларын саҥардан оҥорууга кыаҕы биэрэллэр уонна эрэгийиэҥҥэ наукоемкай саҥа салаалары сайыннараллар”, — диэтэ Саха сирин Ил Дархана Айсен Николаев.

Академик Валентин Пармон Саха сирэ кэнники сылларга Арассыыйа наукатын бэйэтигэр тардарын бэлиэтээтэ. “Бу судаарыстыба Арктика түөлбэтин сайыннарыыга улахан болҕомтотун кытта сибээстээх. Ол курдук, РНА Сибиирдээҕи салаата икки нэдиэлэ анараа өттүгэр “Большая Сибирь и Арктика” норуоттар икки ардыларынааҕы дьыалабыай пуорум үлэтин тэрийбитэ. Онно Саха сирин доруобуйа харыстабылын боппуруостарын, баайдаах сирдэр кыахтарын көрбүппүт”, — диэн Валентин Пармон кэпсээтэ.

Өрүттэр Томтордооҕу уонна Попигайдааҕы баайдаах сирдэри баһылааһын кэскилин дьүүллэстилэр. Бу баайдаах сирдэр дойду технологическай суверенитетын хааччыйыы соруктарыгар тыын суорлталаахтара бэлиэтэннэ. “Биһиги бу боппуруоһу Роснедр салалтатын уонна Белоруссиятааҕы кэллиэгэлэри кытта дьүүллэстибит”, — диэн академик иһитиннэрдэ.

Көрсүһүүгэ Валентин Пармон РНА Сибиирдээҕи салаата Саха сирин исписэлиистэригэр Саха сирин оҥорон таһаарар күүстэрин чинчийэр научнай эспэдииссийэтин саҥа бырагырааматын торумнааһыҥҥа көмөлөһүөхпүт диэн эрэннэрдэ. Көрсүһүүгэ РНА СС бэрэссэдээтэлин солбуйааччы, РНА академига Николай Похиленко кытынна.

sakha.gov.ru

хаартыска: Андрей Сорокин, ЯСИА

Сиһилии: https://www.sakha.gov.ru/news/16100