Айсен Николаев Саха сиригэр инвестиция килиимэтин тупсарыыга биисинэһи кытта бииргэ  үлэлээһини күүһүрдэргэ эттэ

Айсен Николаев Саха сиригэр инвестиция килиимэтин тупсарыыга мунньаҕы ыытта.

Айсен Николаев бэлиэтииринэн, 2023 сыл түмүгүнэн өрөспүүбүлүкэ Арассыыйаҕа инвестиция үүнүүтүнэн ТОП-10 иһигэр киирдэ уонна Уһук Илиҥҥэ иккис миэстэни ылла. “2023 сылга Саха сирин экэниэмикэтигэр 2022 сылга тэҥнээтэххэ инвестиция  4,4 бырыһыан үрдээн, 740 млрд солк. тардылынна. Бу өрөспүүбүлүкэ историятыгар рекордунан буолар”, — диэтэ кини.

Ол да буоллар, Саха сирин баһылыга былаас уорганнара биисинэс түмсүүтүн кытта бииргэ үлэлээһиннэрэ мөлтөҕүн ыйда. “Инвест килиимэккэ мунньахтар ыытыллыбаттарын кэриэтэ. Дьоҕус, орто уонна бөдөҥ биисинэһи кытта үлэ ситэтэ суох. Тутаах ыстаапкалар үрдээбиттэринэн урбаанньыттар сөптөөх өйөбүлү ылбакка, у кирэдьиити үрдүк бырыһыаҥҥа ылаллар”, — диэтэ Айсен Николаев.

Эрэгийиэн баһылыга өрөспүүбүлүкэ муниципалитеттара үлэни күүһүрдүөхтээхтэрин ыйда, ол иһигэр Дьокуускайга. “Дьокуускай урбаанньытарыттан үгүс сэмэлээһиннэр киирэллэр. Киин куорат эппиэттээх структуралара биисинэһи кытта көрсүбэттэр.  Сөптөөх быһаарар үлэ ыытыллара буоллар, маннык үҥсүүлэр киириэ суоҕа этилэр”, —— диэн бэлиэтээтэ Айсен Николаев. Кини ресурсанан хааччыйар тэрилтэлэр биисинэс эбийиэктэрин техническэй холбооһуҥҥа үлэлэрин үчүгэйинэн сыаналаата.

“Дойду уонна өрөспүүбүлүкэ таһымыгар улахан үлэ түмүгэр уот, гаас, уу ситимигэр холбооһун көдьүүһэ үрдээтэ. Теххолбооһун болдьоҕун уһатыы дьоҕус уона бөдөҥ биисинэскэ кыһалҕаны үөскэтэр”, — диэтэ эрэгийиэн баһылыга. – Ол иһин инвесткилиимэти тупсарыы үлэтин күннэтэ ыытыллыахтаах”.

Мунньах кэмигэр Саха сирин баһылыга урбаанньыттар экспорка үлэлэрин өйөөһүн таһыма аччаабытыттан астымматын биллэрдэ. “Экспорты сайыннарыыга туһуламмыт институттар бааллар эрээри, күн бүгүн бөдөҥ бырамыысыланнас тэрилтэлэрэ эрэ дьарыктаналлар”, — диэтэ Айсен Николаев. Уһук Илин ФУо Стратегическай       көҕүлээһиннэр агентстволарын бэрэстэбиитэлэ Ольга Курилова, “Опора России” Саха сиринээҕи салаатын салайааччыта Сардана Павлова этиилэрин истэн баран, Саха сирин баһылыга кыһалҕалары быһаарыыга биисинэһи кытта сүбэлэһиини куруутун ыытарга, СӨ Бырабыыталыстыбатын Бэрэссэдээтэлин нэдиэлэтээҕи планеркатын бэбиэскэтигэр киллэрэргэ эттэ.

“Мин бырабыыталыстыбаҕа уонна муниципалитеттарга өрөспүүбүлүкэҕэ инвестиционнай килиимэти тупсарыыга күүскэ үлэлэһэллэригэр сүбэлиибин. Ол эбэтэр былаас уонна биисинэс куруук сибээстэһиэхтээхтэр”, — диэтэ Айсен Николаев. Арассыыйа эрэгийиэннэригэр инвестиционнай килиимэт туругун Стратегическай көҕүлээһиннэр агентстволара 2014 сылтан РФ Бэрэсидьиэнин Владимир Путин сорудаҕынан оҥорор.

Саха Өрөспүүбүлүкэтин Ил Дарханын уонна Саха Өрөспүүбүлүкэтин Бырабыыталыстыбатын пресс-сулууспата