Айсен Николаев Саха сиригэр култуура эбийиэктэрин тутуутун дьүүллэстэ

СӨ Ил Дархана Айсен Николаев Саха сиригэр эбийиэктэр тутууларын хаамыытын хонтуруоллуур суһал ыстаабын мунньаҕын ыытта. Мунньах кэмигэр култуура эбийиэктэрин боппуруостара көрүлүннүлэр.

Мунньах сүрүн боппуруостарыттан биирдэстэринэн 2026 сылга үлэҕэ киириэхтээх В.А. Босиков аатынан Муусука үрдүкү оскуолатын тутуутун иккис түһүмэҕин олоххо киллэриитэ буолла. 10 тыһыынча кэриҥэ квадратнай миэтэрэ иэннээх саҥа комплекс аныгылыы үөрэнэр аудиториялардаах, репетициялыыр саалалардаах, кэнсиэртиир саалалаах, ону тэҥэ 150 иитиллээччигэ аналлаах интэринээттээх буолуоҕа.

Үөрэнэр куорпус 240-ҕа диэри устудьуону хабар кыахтаах. Айсен Николаев Муусука үрдүкү оскуолатын бырайыага ураты болҕомтолоохтук уонна толору эппиэтинэстээхтик олоххо киириэхтээҕин бэлиэтээтэ. Бу — Арассыыйа Бэрэсидьиэнэ Владимир Путин бэйэтинэн өйөөбүт федеральнай эбийиэгинэн буолар. Кини бэлиэтээбитинэн, тутууну болдьоҕор уонна үрдүк хаачыстыбалаахтык түмүктүөххэ наада, тоҕо диэтэххэ, бу комплекс Саха сирин уонна бүтүн Уһук Илин эдэр талааннарыгар суолталаах үөрэх уонна култуура киининэн буолуоҕа.

Санаттах, «Култуура» национальнай бырайыак чэрчитинэн Сунтаар улууһун Кириэстээх сэлиэнньэтигэр «Саргы түһүлгэтэ» социальнай-култуурунай киин тутуута түмүктэммитэ. Бу бырайыак соруктара РФ Бэрэсидьиэнэ Владимир Путин көҕүлээһининэн, 2025 сылтан саҥа «Дьиэ кэргэн» национальнай бырайыагын састаабыгар киирэн олоххо киирэллэр.