Айсен Николаев: «Саха сирин куораттара дойдуга бастыҥынан буолуохтара»

Санкт-Петербурдааҕы норуоттар икки ардыларынааҕы экэнэмиичэскэй пуорум кэмигэр Ил Дархан Айсен Николаев дойду куораттара сайдыыларыгар туһуламмыт сиэссийэҕэ кыттыыны ылла.  

Бу тэрээһиҥҥэ кини куораттары сайыннарыы боппуруостарыгар олохтоохтор санааларын истии, кинилэри кытта сүбэлэһии улахан оруоллааҕын ыйда.

Ил Дархан уонна Бырабыыталыстыба пресс-сулууспата иһитиннэрбитинэн, Саха сирин Аҕа баһылыга РФ Бэрэсидьиэнэ Владимир Путин Уһук Илин уокуруктарын сайыннарыыга улахан болҕомтотун уурарын бэлиэтээтэ. Ол курдук, дойду баһылыгын көҕүлээһиннэрин олоххо киллэрии чэрчитинэн  Дьокуускай уонна Нерюнгри куораттар маастар-былааннара оҥоһуллубуттара. Уһук Илин олоҕун-дьаһаҕын усулуобуйата учуоттанан, бэрэсидьиэн быһаарыытынан, бырабыыталыстыба былаанынан РФ Тутууга министиэристибэтэ туспа маастар-былаан куонкуруһун ыытар.

Онон Ил Дархан Айсен Николаев “Уһук Илин өйөбүлүнэн Саха сирин куораттара дойдуга бастыҥынан буолуохтара” диэн бэлиэтээтэ.