Айсен Николаев Саха сирин тирэх пуунун үлэһиттэригэр махтанна

«Биһиги байыастарбытыгар анаммыт тиэхиньикэ, таҥас-сап, мал-сал, ийэлэр  кыһамньыларынан хомуллубут кэһиилэр барыта бу пуун нөҥүө ааһаллар. Ханнык даҕаны дьыл кэмигэр, күнүгэр пуун үлэһиттэрэ байыастарбытыгар анаммыт таһаҕас тиийэригэр тохтоло  суох үлэлииллэр.  Мин манна алтыспыт дьоммунан чахчы даҕаны киэн туттабын. Манна дьиҥнээх патриоттар үлэлииллэр.   Күн ахсын кинилэр байыастарбыт тустарыгар кыһамньылаахтык үлэлииллэр. Хас биирдии байыас биһиги өйөбүлбүтүн билэрин туһугар кыһаллаллар», — диэн бэлиэтиир Айсен Николаев.

Ил Дархан   Саха сирин бары олохтоохторун аатыттан тирэх пуун үлэһиттэригэр махтанна.

Бэлиэтээн эттэххэ, СӨ Ил Дарханын дьаһалынан ДНӨ ааспыт сыл сэтинньитигэр эрэгийиэммит тирэх пууна тэриллибитэ. Бу пуун байыастары кытта ыкса сибээһи тутарга сүрүн оруолу толорбута.

ДНӨ тирэх пуун үлэлиэҕиттэн байыастарга уопсайа 120 тиэхиньикэ, олор истэригэр «Сокол» квадроцикллар, 550 БПЛА,   тепловизордар,  электрогенератордар,   оһохтор,  о.д.а туһалаах мал-сал, тиэхиньикэ арааһа тиийбитэ.