Айсен Николаев Саха сириттэн сылдьар байыастарга саҥа вездеходтары биэрдэ

Айсен Николаев Донецкай Норуодунай Өрөспүүбүлүкэҕэ үлэлиир. Тирэх пууҥҥа Ил Дархан байыастардыын кэпсэттэ итиэннэ саҥа тиэхиньикэлэри биэрдэ, диэн иһитиннэрэр Ил Дархан, Бырабыыталыстыба пресс-сулууспата.

Саха сириттэн сылдьар дьон сулууспалыыр чаастара “Патриотическай” ТОР резиденэ “Якт-Сокол” ХЭТ оҥорбут 7 вездеходугар сэртипикээт ыллылар. Тиэхиньикэ бу күннэргэ бастакы кирбиигэ барыаҕа.

“Биир дойдулаахтарым ааттарыттан биһиги дойдубут туһугар оҥорор хорсун быһыыгыт иһин  махтал үтүө тылларын тиэрдэбин. Биһиги эһиэхэ салгыы көмөлөһө туруохпут. Бүгүн эмиэ хас да тиэхиньикэни биэрэбит, өстөөҕү түргэнник сууһаран, дьиэҕитигэр төннө охсоргут туһугар. Сүрүнэ – бэйэҕитин харыстаныҥ. Биһиги эһигини олус кэтэһэбит”, — диэтэ Ил Дархан байыастарга туһаайан.

Айсен Николаев РФ Бырабыыталыстыбатын Бэрэссэдээтэлин солбуйааччы — УИУо Бэрэсидьиэн боломуочуйалаах бэрэстэбиитэлэ Юрий Трутнев көҕүлээһининэн “Патриотическай” ТОР бырагыраама чэрчитинэн байыаннай дьайыы наадатыгар тиэхиньикэни оҥоруу улааппытын туһунан эттэ.

“Сыл бүтүөр диэри өссө аҕалыахпыт. Юрий Трутнев биһиэхэ баһаамы көмөлөһөр, онон тиэхиньикэни оҥоруубутун улаатыннарар кыахтанныбыт. Ол, бастатан туран, биһиги Илиҥҥи бөлөхтөһүүбүт байыаннай  чаастарыгар бэриллиэҕэ”, – диэтэ кини.