Айсен Николаев Сбербаан Байкаллааҕы баанын бэрэссэдээтэлэ Рушан Сахбиевы көрүстэ

Айсен Николаев Сбербааҥҥа туһалаах уонна түмүктээх үлэтин иһин махтанна. Кини холбоһуктаах былааннар кэмиттэн кэмигэр олоххо киирэллэрин бэлиэтээтэ уонна баантан киирэр нолуок сыл аайы үрдээн иһэрэ, холбоһуктаах социальнай суолталаах көҕүлээһиннэри өйүүр кыаҕы биллэрдик күүһүрдэрин  эттэ.

«Биһиги бииргэ олоххо киллэрэр бырайыактарбытын өйүүр оруола, биллэн турар, улахан. Элбэх холбоһуктаах бырайыактарбыт дойду үрдүнэн Оҥоһуу өй эйгэтигэр бастыҥ холобур быһыытынан көрдөрүллүбүттэрэ олус үчүгэй. Бу үлэни салгыы ыытыахпыт диэн эрэнэбин. Социальнай өйөбүл суолтатын туспа бэлиэтиэм,  үбүнэн эрэ буолбакка, баан өрөспүүбүлүкэ социальнай эйгэтигэр болҕомтотун уурарын көрдөрөрүнэн эмиэ улахан суолталаах», — диэтэ Ил Дархан.

Оттон Рушан Сахбиев Сбербаан Саха сиригэр тупсарыы, үөрэх, каадырдары бэлэмнээһин уонна мэдиссиинэ сайдыытыгар, аан дойду бастыҥ стандартарыгар олоҕуран, ураты болҕомтону уурарын бэлиэтээтэ. Көрсүһүүгэ Дьокуускай куорат сирдэрин көҕөрдүү уонна куорат инфраструктуратын саҥардыы туһунан көҕүлээһиннэр ырытылыннылар.

Сахбиев эппитинэн, ити үлэ биллэр-көстөр түмүктэрин олохтоохтор кэлэр сайын көрөр кыахтаныахтара диэн былааннанар. Сбербаан Байкаллааҕы баанын бэрэссэдээтэлэ нэһилиэнньэни уонна биисинэһи кытта тиһиктээх үлэҕэ туспа тохтоото. Билигин Саха сиригэр баан 100-тэн тахса салаата үлэлиир, ол иһигэр ыраах, тиийэргэ уустук оройуоннарга баар филиаллар киирэллэр. Салаалар күүскэ саҥардыллаллар уонна омук уратытын учуоттаан киэргэтиллэллэр. Сахбиев ону тэҥэ, судаарыстыба өйөбүллээх олорор дьиэни кирэдьииттээһин баан эрэгийиэҥҥэ үлэтин биир сүрүн хайысхатынан хааларын бэлиэтээтэ. Сбер өрөспүүбүлүкэ социальнай бырайыактарыгар – үөрэх, култуура, аһымал аахсыйалар эйгэлэригэр, ону тэҥэ «Оскуола 21» бырайыагы сайыннарыыга үгэс быһыытынан кыттар. Көрсүһүүгэ инфраструктурнай бырайыактарга ураты болҕомто уурулунна. Ол иһигэр – Дьааҥытааҕы судоверфи сайыннарыы уонна саҥа оскуолалары тутуу.

Дьокуускайга эрэгийиэн бырабыыталыстыбатын уонна «ПроШкола» ХЭТ (ВЭБ.рф оҕотун тэрилтэтэ) икки ардыларынааҕы концессионнай сөбүлэһиилэр чэрчилэринэн 360 уонна 990 миэстэлээх икки үөрэх кыһата аһылынна. Сбербаан маннык бырайыактарга салгыы кыттар бэлэмин бигэргэттэ. Үлэ түһүмэҕинэн көрсүһүү Саха сирин олохтоохторун уонна биисинэһин интэриэһигэр холбоһуктаах үлэни салгыыр уонна бииргэ үлэлээһин хайысхаларын кэҥэтэр туһунан сөбүлэһиинэн түмүктэннэ.