Айсен Николаев СӨ Бырабыыталыстыбатын уонна дьаһалтатын салалтатыгар саҥа соруктары туруорда

Ил Дархан Айсен Николаев СӨ Бырабыыталыстыбатын уонна дьаһалтатын салалтатын кытта  сүбэ мунньаҕы ыытта  уонна чугастааҕы соруктары  туруорда. Айсен Николаев үрдүк технологиялаах мэдиссиинэ көмөтүн оҥоруу боппуруостарыгар туспа тохтоон ааста.

Кини кэлиҥҥи сылларга Саха сиригэр үрдүк технологиялаах мэдиссиинэ оборудованиета элбэхтик туруоруллубутун бэлиэтээтэ. Ону атыылаһар эрэ буолбакка, сөптөөхтүк көрөн үлэлэтэр эмиэ улахан суолталааҕын ыйда.

«Доруобуйа харыстабылын министиэристибэтэ үрдүк технологиялаах оборудованиелары, сервиснэй дуогабардар нөҥүө туруктаах, хаачыстыбалаах буолууларын хааччыйыахтаах. Атыылаһыллыбыт оборудование тохтобула суох үлэлиэхтээх, быраастарга көмөлөһүөхтээх уонна дьоҥҥо кэмигэр мэдиссиинэ көмөтүн мэктиэлиэхтээх. Ону сэргэ быһыы биэрии уонна респираторнай ыарыыны сэрэтии үлэтин күүһүрдэргэ сорудахтыыбын», — диэн баһылык сорудаҕын эттэ.

Сүбэ мунньах кэмигэр сытыы респираторнай вируснай инфекция түбэлтэтэ 10,3% элбээбитин эттэ. Ыарыы эбиллиитэ нэһилиэнньэ бары саастаах бөлөхтөрүгэр бэлиэтэнэр. Уопсай нэһилиэнньэҕэ, улахан дьоҥҥо уонна оскуола оҕолоругар 7-тэн 14-гэр диэри саастаахтарга, ыарыы эпидемическай боруогу куоһарбыт. 6 саастарыгар диэри оҕолор ортолоругар ОРВИ ыарыыта орто көрдөрүүнү куоһарбатах. Саха сиригэр былааннанар вакциналар кээмэйдэрин 100%-на тиэрдиллибит. Бүгүҥҥү күҥҥэ оҕолору вакцинациялааһын былаана — 75,8%, улахан дьоҥҥо — 45,7% туолбут. Баһылык улахан дьоҥҥо хаалыы баарын болҕомтоҕо ылла.

«Быһыы биэрии балаһыанньата ортонон сыаналанар. Маны күүскэ ылсаргыт наада — үлэ оҥорон таһаарыытыгар уонна нэһилиэнньэ доруобуйатын харыстааһыныгар быһаччы сибээстээх. Билигин ыарыы элбээн иһэрэ биллэр, онон үлэни күүһүрдүөххэ  наада. Бу бириэмэҕэ хампаанньа түмүктэниэхтээх«, — диэн Айсен Николаев эттэ, диэн иһитиннэрэр www.sakha.gov.ru.