Айсен Николаев Сэбиэскэй Сойуус Дьоруойа Федор Попов пааматынньыгар сибэкки дьөрбөтүн уурда

Бүгүн Аҕа дойду Дьоруойдарын күнүгэр Ил Дархан Айсен Николаев Мэҥэ Хаҥалас улууһун Сыымах сэлиэнньэтигэр Сойуус Дьоруойа Федор Попов пааматынньыгар уонна Дьоруой Ийэлэр мемориалларыгар сибэкки дьөрбөтүн уурда.

Федор Кузьмич Попов 1921 сыл ахсынньы 8 күнүгэр Мэҥэ Хаҥалас улууһугар Баатара нэһилиэгэр төрөөбүтэ. Кини  1943 с. алтынньы 1 күнүгэр Глушец диэн дэриэбинэ аттыгар биир бастакынан Днепр өрүһү туораан, өстөөх траншеяларыгар бастакынан тиийэн хорсун быһыыны көрдөрбүтэ. 1944 с. тохсунньу 15 күнүгэр ССРС Үрдүкү Сэбиэтин Президиумун Ыйааҕынан Ф.К.Поповка Сэбиэскэй Сойуус Дьоруойун аата иҥэриллибитэ.

Айсен Николаев бэлиэтээбитинэн, Аҕа дойду Дьоруойдарын күнүн иннинэ бэҕэһээ Дьокуускайга бастакы фашизмы утары өрөспүүбүлүкэтээҕи пуорум ыытыллыбыта. Бу тэрээһин фашизмы уонна неонацизмы утарар дьону бииргэ муста.

«Кырдьык мөлүйүөнтэн тахса киһи дьылҕатынан суруллубута. Саха сиригэр сэрии таарыйбатах дьиэ кэргэнэ суох. Аҕа Дойду Улуу сэриитигэр Саха сириттэн 62 тыһыынчаттан тахса киһи ыҥырыллыбыта. Онтон 38 тыһыынча киһи Аҕа дойдуларын уонна аан дойдуну нацизмтан босхолооһун иһин олохторун биэрбиттэрэ. Арҕаа дойдулар пропагандалара биһиги историябытын былдьыа суохтара, дьиҥнээҕи уларытар кыаҕа суох», — диэтэ Айсен Николаев.

Саха сирэ күүскэ тыылга үлэлээбитэ. Сахалар ыарахан усулуобуйаҕа көмүс, түүлээх, балык, итиэннэ сөмөлүөттэр уонна таанкалар тутууларыгар аналлаах тэриллэри бэлэмнээбиттэрэ. Дойду бэрэсидьиэнэ Владимир Путин ыйааҕынан Дьокуускай уонна Алдан “Килбиэннээх үлэ куората” бочуоттаах ааты ылбыттара.