Айсен Николаев Сергей Собянинныын көрүстэ

Москва мээрэ Сергей Семенович Собянины кытта көрсүбүтүн туһунан Ил Дархан Айсен Николаев МАХ ханаалыгар суруйда. Онно кини Саха сирэ Москваны кытта араас хайысхаларга көхтөөхтүк бииргэ үлэлиирин бэлиэтээтэ.

— Кэнники  сылларга биһиги бииргэ ситимнээхтик үлэлиибит: биирдиилээн көҕүлээһиннэртэн биһиги инновация кластерын, үөрэх көрүҥнэрин уонна пилотнай бырайыактары түмэр бигэ моделга киирдибит.

Бу хайысханы хайдах салгыы үлэлэтэри дьүүллэстибит – икки эрэгийиэн хамаандаларын  уонна сайдыы институттарын үлэлэрин хайдах бииргэ кэҥэтэр туһунан кэпсэттибит, венчурнай ньымалар нөҥүө кэскиллээх көҕүлээһиннэри өйөөһүнү киллэрэн туран.   Креативнай индустрияларга анаан-минээн болҕомтобутун уурдубут, чуолаан, киинэҕэ. Саха киинэлэрэ бэйэлэрин тустарынан дойдуга уонна норуоттар икки ардыларынааҕы былаһааккаҕа бигэтик ааттарын биллэрдилэр.

Бу тэтими ыһыктыбакка, Саха киинэтэ салгыы киэҥ аудиторияҕа тахсыытыгар көмөлөһүөххэ. Сергей Семенович бииргэ үлэлэһиини салгыы сайыннарыыга биһиги этиилэрбитин өйөөтө, — диэбит Ил Дархан Айсен Николаев ити көрсүһүү туһунан.

Итиэннэ Сергей Собяниҥҥа аһаҕастык уонна таһаарыылаахтык кэпсэппиттэрин иһин махтаммыт. Саха сирэ уонна Москва бииргэ үлэлээһиннэрэ эрэгийиэннэр олохтоохторун уонна Арассыыйа бүттүүнүн туһугар өссө күүһүрүө диэн эрэлин биллэрбит.