Айсен Николаев Сунтаар улууһун баһылыга Анатолий Григорьевтыын көрүстэ

Айсен Николаев Сунтаар улууһун баһылыга Анатолий Григорьевы кытта оробуочай көрсүһүүтэ тохсунньу 29 күнүгэр буолла.

Салайааччылар улуус социальнай-экэнэмиичэскэй сайдыытын билиҥҥи боппуруостарын тула кэпсэттилэр. Көрсүһүү кэмигэр Ил Дархан байыаннай дьайыы кыттыылаахтарын уонна кинилэр дьиэ кэргэттэрин өйүүр үлэ улахан суолталааҕын бэлиэтээтэ, диэн иһитиннэрэр Ил Дархан, бырабыыталыстыба пресс-сулууспата.

“Байыаннай дьайыы кыттыылаахтарыгар уонна кинилэр дьиэ кэргэттэригэр көмөнү тэрийии улууска ситиһиллибит тэтими намтаппакка бара туруохтаах. Салалта байыаннай дьайыы  бэтэрээннэрин үлэнэн хааччыйыыга уонна психологическай-социальнай реабилитацияны оҥорууга ураты болҕомтотун ууруохтаах», — диэн бэлиэтээтэ Айсен Николаев.

Маны таһынан, Кэмпэндээйи сэлиэнньэтигэр оскуола-уһуйаан дьиэтин тутуу боппуруоһун көрдүлэр. 1950-с сылларга тутуллубут оскуола мас дьиэтэ эргэрбитэ ырааппыт. Саҥа эбийиэк бырайыактыыр-сметнай докумуоннара оҥоһуллубуттар, судаарыстыбаннай эспэртииһэ үчүгэй түмүгэ ылыллыбыт.

Өссө буолаары турар үбүлүөйдээх тэрээһиннэри – сайын буолуохтаах Сергей Зверев-Кыыл Уола төрөөбүтэ 125 сылыгар аналлаах өрөспүүбүлүкэтээҕи Ыһыах уонна 2026 сыллаахха Сунтаар улууһа төрүттэммитэ 225 сыла туолуохтааҕын туһунан кэпсэттилэр.