Айсен Николаев сүөһү аһылыгын бэлэмнээһиҥҥэ соруктары туруорда

Ил Дархан Айсен Николаев бэс ыйын 5 күнүгэр тустаах биэдэмэстибэлэри уонна муниципальнай тэриллиилэр  баһылыктарын кытары мунньахха сүөһү аһылыгын бэлэмнээһин хампаанньатыгар соруктары туруорда.

2025 сылга өрөспүүбүлүкэҕэ 435 тыһыынчаттан тахса туонна оту, 13,5 тыһыынча туонна курдук сенаһы уонна 24 тыһыынчаттан тахса сиилэһи бэлэмниир сорук турар.

Кыһыҥҥы кэмҥэ кэмигэр уонна хаачыстыбалаахтык бэлэмнэнии боппуруоһа  биһиги үлэбит дьоһун суолталаах хайысхатынан буолар. Үлэни төһөнөн түмсүүлээхтик, хаачыстыбалаахтык ыытарбытыттан  тыа хаһаайыстыбата этэҥҥэ буолара тутулуктаах”, — диэтэ Айсен Николаев.

Кини ону таһынан муниципалитеттар тыа хаһаайыстыбатыгар бэриллибит боломуочуйаларынан үлэлэрин бастакы сыла буоларын уонна түмүк уруккутааҕар үчүгэй буолуохтааҕын бэлиэтээн эттэ.

Сүөһү аһылыгын бэлэмниир хампаанньаны ыытарга миэстэтигэр эппиэтинэстээх дьон ананыахтара. Үлэ хаамыытыгар мониторинг тиһигин быспакка ыытыллыаҕа уонна үөскүүр кыһалҕалары суһаллык туоратыахтара.

Олохтоох оҥорон таһаарыыны уонна туризмы сайыннарыы туһунан Ил Дархан стратегическай ыйааҕынан 2030 сылга туһаныллар бааһыналар иэннэрин 70 тыһыынча гектарга тиийэ улаатыннарар сорук турар.

СӨ Ил Дарханын уонна бырабыыталыстыбатын пресс-сулууспата.