Айсен Николаев Сыымахха элбэх оҕолоох Тарасовтар дьиэ кэргэттэригэр ыалдьыттаата

Гаастааһын чэрчитинэн кинилэр дьиэлэригэр гаас киирбит. Ил Дархан дьиэ кэргэни бу бэлиэ күнүнэн эҕэрдэлээтэ, дьолу-соргуну, байылыат олоҕу баҕарда, бэлэхтэрин туттарда.

“Сыымах сэлиэнньэтэ ыраах сытар, онон манна гаас кэлэн дьон өйүн-санаатын уларытта, ол барыта дьон олоҕун тупсарыаҕа. Хайыы үйэ гааһы киллэриигэ 115 дуогабар түһэрсиллибит, хочуолунай гаастаммыт. “Сахатранснефтегаз” хампаанньа кылгас кэм иһигэр нэһилиэктэр ыккардыларыгар гааһы тарда, “Газпром газификация” үбүгэр нэһилиэк иһигэр гааһы киллэрэ охсубута – бу бэйэтэ үлэ хорсун быһыыта буолар. Биһиги Бэрэсидьиэммит социальнай гаастааһын бэлиитикэтин киллэрэн, Саха сирин олохтоохторо бу бырагырааманан олохторун уйгутун тупсараллар, астына туһаналлар”, — диэн тоһоҕолоон бэлиэтээтэ Айсен Николаев.

Николайдаах Сардаана түөрт оҕолоохтор. Кинилэргэ элбэх оҕолоохторун быһыытынан социальнай гаастааһын чэрчитинэн гаас оборудованиетын атыылаһалларыгар, туруортаралларыгар субсидия көрүллүбүт, барыта 202 тыһ. солк. суумалаах үлэ оҥоһуллубут, ол онтон 100 тыһ. солкуобайа федеральнай үбүлээһинтэн киирбит, 100 тыһ. солк. өрөспүүбүлүкэ бүддьүөтэ уйуммут.

Тарасовтар дьиэ кэргэттэрин дьонноро-сэргэлэрэ ытыктыыллар, нэһилиэк уопсастыбаннай олоҕор көхтөөхтүк кытталлар. “Өрөспүүбүлүкэҕэ маннык бырагыраама үлэлиирэ олус бэрт эбит”, — диэн аҕа баһылык Николай Тарасов санаатын үллэһиннэ.

Кини “Анаабыр алмаастар” АУо силиэсэрэ, баахтанан баран үлэлиир, Сардаана Николаевна “Кэскил” уһуйаан музыкальнай салайааччыта. Билим чэрчитинэн 2025 сылтан моонньоҕон плантациятын салайан үлэлэтэр. Николайдаах Сардаана оҕолорун иитиитигэр улахан болҕомтолорун уураллар, кыра эрдэхтэриттэн үлэҕэ такайаллар.

“Саха сиригэр социальнай гаастааһын бырагыраамата бэһис сылын үлэлиир. Бырагыраама РФ Бэрэсидьиэнэ Владимир Путин сорудаҕынан “Биир ньыгыл Арассыыйа” баартыйа Норудунай бырагырааматын чэрчитинэн ыытыллар. 2021 сылтан өрөспүүбүлүкэҕэ 9,9 тыһыынча дьиэ гааска холбонно”, — диэн “Сахатранснефтегаз” АУо гендириэктэрэ Алексей Колодезников бэлиэтээтэ.

Быйыл социальнай гаастааһын бырагырааманан 1300 дьиэ холбоммут. Ону тэҥэ Айсен Николаев сорудаҕынан уонна өйөбүлүнэн нэһилиэнньэлээх пууннары гаастыыр өрөспүүбүлүкэтээҕи бырагыраама чэрчитинэн ситимҥэ гаас аҕыйааһынын таһаарбат, саҥа гаас ситимин тардар, эргэрбит гаас ситимнэрин, атын да инфраструктураны уларытар үлэ бара турар, диэн иһитиннэрэр Ил Дархан, бырабыыталыстыба пресс-сулууспата.