«Мин Павел Сергеевич уоппускатыгар дьиэтигэр баар кэмигэр сырыттым. Олус истиҥ уонна наадалаах көрсүһүү буолла. Киниттэн тус бэйэтиттэн байыаннай дьайыыга дьыала хайдах баран иһэрин иһиттим«, — диэн бэлиэтиир Айсен Николаев.
Павел Хлуднев былырыын мобилизацияламмыт. Илиҥҥи байыаннай уокурукка эбии бэлэмнэниини барбыт уонна байыаннай дьайыы буола турар сиригэр ыытыллыбыт. Кини онно бэйэтин хорсун байыас быһыытынан көрдөрбүт. Бааһыран, эмтэнэн баран билигин уоппускатыгар дьонугар кэлэ сылдьар.
«Уолаттары кытары сибээспин ыкса тута сылдьабын. Сотору байыаннай-врачебнай хамыыһыйа кэнниттэн кинилэргэ төттөрү тиийиэм. Бастакы кылгас кэмнээх уоппускабар Томпо оройуона миэхэ онно наһаа наадалаах тэрили — БПЛА биэрбитэ. Атын эрэгийиэн оҕолоро, сорохтор, Саха сирэ улахан өйөбүлү оҥорорун тоһоҕолоон бэлиэтииллэр«, — диэн кэпсиир Павел Хлуднев.
Дьиэ кэргэн үс уоллаах. Элбэх оҕолоох дьиэ кэргэн бары өйөбүлүнэн туһанар. Ыал аҕа баһылыга Павел Хлуднев бары төлөбүрү уонна материальнай көмөнү ылбыт.
Кэргэнэ Татьяна Викторовна сибээһи ыкса тута сылдьыбыт. «Павел Ростовтааҕы Дон госпиталыгар киирбит күнүгэр тута Саха сирин волонтердара тиийбиттэрэ. Бэл, тайах мас аҕалбыттар этэ. Көмө кэмигэр оҥоһуллубута«, — диир кини.
«Бэртээхэй дьиэ кэргэн. Оҕолор аҕаларын наһаа таптыыллар уонна кининэн киэн тутталлар, кини дьиҥнээх дьоруой. Дьоно аҕаларын сулууспатын туһунан барытын билэ-көрө олорбуттар. Көрсүһүүгэ оҕолор аҕаларыгар анаабыт олус үчүгэй хоһооннору ааҕан долгуттулар. Дьиэ кэргэнэ соҕотох буолбатаҕын билэр, Саха сирэ кинилэргэ куруук көмөлөһүө, өйүө. Павел Сергеевич улахан бойобуой уопуттаах буоларын быһыытынан, инники кирбиигэ сылдьааччыларга наадалаах техническэй хааччыйыыга туһалаах сүбэлэри биэрдэ. Кини олус сэргэх киһи, байыаннай дьайыыга сылдьар кэмигэр, Томпо оройуонугар муоста уонна аэропорт тутуллубутуттан олус үөрэр«, — диэн бэлиэтиир Ил Дархан Айсен Николаев.
Ил Дархан Саха сирин салалтата мобилизацияламмыттары уонна кинилэр дьиэ кэргэттэрин өйүүр миэрэлэри кэҥэтэргэ мэлдьи үлэлиирин бэлиэтээтэ. Манна 200 тыһ.солк. кээмэйдээх биир кэмнээх материальнай көмө, оҕо саадын төлөбүрүттэн босхолооһун, оскуолаҕа босхо аһылык, оҕо доруобуйатын чэбдигирдэр лааҕырдарга босхо путевкалар, үрдүк үөрэх уонна орто анал үөрэх кыһаларыгар тус сыаллаах босхо үөрэх, төрөппүттэрэ мобилизациянан сулууспалыыр кэмнэригэр орто анал уонна үрдүк үөрэххэ үөрэнэр устудьуоннарга үрдэтиллибит истипиэндьийэ, байыаннай сулууспалаах төрөппүттэригэр санаторнай-курортнай эмтэниини тэрийии, бойобуой дьайыылар бэтэрээннэрин уонна мобилизацияламмыт байыастар дьиэ кэргэттэрин дьиэлэрин гаастааһыҥҥа 150 тыһ.солк. көмөнү оҥоруу, о.д.а. миэрэлэр киирэллэр.