“Тымныы полюһа-Өймөкөөн” IV-с кыһыҥҥы экстремальнай марафон кыттыылаахтарыгар Ил Дархан эҕэрдэтэ

Убаастабыллаах “Тымныы полюһа-Өймөкөөн” IV-с кыһыҥҥы экстремальнай марафон кыттыылаахтара уонна тэрийээччилэрэ!

Саха өрөспүүбүлүкэтин салалтатын аатыттан уонна тус бэйэм эһиэхэ, Аан дойду муҥутуур тымныы сиригэр эҕэрдэбин тиэрдэбин. Бу сүүрүү тэрээһинэ төрдүһүн быйыл төрдүс төгүлүн ыытыллар.

Бу араас саастаах, туспа идэлээх успуорт туһугар ыалдьааччылары түмэр, дьулуурдаах, тулуурдаах дьоммут тыйыс тымныыттан чаҕыйбакка, кыһыҥҥы кэмҥэ уһун кэрчиккэ сүүрэн, киһи кыаҕа муҥура суоҕун дакаастыыр тэрээһиннэрэ. Тымныыттан, уустук усулуобуйаттан чаҕыйбакка маннык тургутууну кыайбыккыт, сыал туруоруммут киһи кыаҕын, санаата күүһүн үүнэр көлүөнэҕэ көрдөрөҕүт, холобур буолаҕыт.

“Тымныы полюһа-Өймөкөөн” туох да саарбаҕа суох чөл олоҕу тутуһууга, успуорду көҕүлээһиҥҥэ, уһун көхтөөх олоҕу сайыннарыыга уонна оҕолору дойдуга бэриниилээх буола иитиигэ улахан суолталаах тэрээһин.

Бу бэлиэ хамсааһын Арассыыйаҕа, атын дойдуларга элбэх киһи болҕомтотун тардар, онон аан дойду саамай тымныы сиригэр, уопсайынан Саха сиригэр туристар кэлэр баҕа санааларын көҕүлүүр. Ону таһынан маннык тэрээһин тымныы киһи этигэр-сиинигэр дьайыытын үөрэтиигэ, намыһах температураларга туһалаах технологиялары сайыннарыыга туһалаах наука чинчийиилэригэр сэҥээриини эбии күүркэтэр. Хас сыл аайы бу бырайыак улаата, үүнэ туруоҕа диэн эрэнэбин, сүүрүүнү таптааччылары эрэ буолбакка, тымныыны үөрэтээччилэр, туризмы сайыннарар интириэстээх дьон эмиэ кыттыахтара дии саныыбын.

Барыгытыгар Сахабыт сирин тымныытын тулуйан ситиһиилээхтик сүүрүүгүтүн түмүктүүргүтүгэр баҕарабын, тус олоххутугар ситиһиилэри, кытаанах доруобуйаны, энчирээбэт күүһү-уоҕу, үүнэ-сайда туруҥ!

Хаартыска https://sakha.gov.ru/