Айсен Николаев Уһук Илин сайдыытын социальнай-экэнэмиичэскэй боппуруостарын сүбэ мунньаҕар кыттыыны ылла

Айсен Николаев Уһук Илин сайдыытын социальнай-экэнэмиичэскэй боппуруостарын РФ Бырабыыталыстыбатын хамыыһыйатын сүбэ мунньаҕар  кыттыыны ылла.

Ол курдук, Уһук Илиҥҥэ  доруобуйа харыстабылын   салаатын боппуруостара  көрүлүннүлэр.

«РФ Бырабыыталыстыбата бу эйгэҕэ улахан үлэни ыытар. Бэрэсидьиэн «Уһук Илиҥҥи биир кэлим субсидията» бырагыраама чэрчитинэн, 2018 сылтан  уопсайа 80 балыыһа, 50-тан  тахса биэлсэр-акушер пууннара аһыллыбыттара. «Доруобуйа харыстабыла» бырагыраама иитинэн, өссө 51 эбийиэк тутуллубут. Ону сэргэ, «Земскэй биэлсэр» уонна «Земскэй дуоктар»  бырагыраамалар үлэлииллэр.  Бу да үрдүнэн мэдиссиинэ эйгэтигэр тыа сиригэр үлэһит илии тиийбэт, уһук сытар оройуоннарга мэдиссиинэ көмөтө намыһах», — диэн РФ Бырабыыталыстыбатын Бэрэссэдээтэлин солбуйааччы – РФ Бэрэсидьиэнин боломуочуйалаах бэрэстэбиитэлэ Юрий Трутнев бэлиэтээтэ.

РФ Доруобуйа харыстабылын миниистирэ Михаил Мурашко бэлиэтээбитинэн, Уһук Илиҥҥэ анал миэрэлэр киллэриллибиттэр. 2024 сылтан ОМС субвенциятыгар   «мэдиссиинэ тиийимтиэ көмөтө» коэффициент киирбит (1,5). Манан учуоттаан эбии 11,2 млрд солкуобай 2026 сылга көрүллүбүт. 2030 сылга диэри 11 перинатальнай киин, дьахталларга аналлаах көрдөрүнэр сир, ону сэргэ 56 эбийиэк уон эрэгийиэҥҥэ маастар-былаан чэрчитинэн былааннанар. Уһук Илиҥҥэ инфраструктурнай уларыйыыларга национальнай бырайыак чэрчитинэн федеральнай үптэн 5% кырата суох үп ыытыллыаҕа.