Айсен Николаев уонна Денис Пушилин Докучаевскайга өрөмүөннүүр-чөлүгэр түһэрэр үлэлэри көрдүлэр

СӨ Ил Дархана Айсен Николаев уонна ДНӨ баһылыга Денис Пушилин Докучаевскайга (ДНӨ) өрөмүөннүүр-чөлүгэр түһэрэр үлэлэр хайдах баран иһэллэрин көрдүлэр-иһиттилэр.

Бу Саха сирэ социальнай уонна инфраструктурнай эбийиэктэргэ үлэни ыытар. Ил Дархан Айсен Николаев Саха сирэ Докучаевскайга 60-тан тахса эбийиэги чөлүгэр түһэрэргэ, өрөмүөннүүргэ 2024 сыллаахха бырайыак оҥорбутун этэр.

— Байыаннай дьайыы саҕаланыытыгар алдьаммыт-кээһэммит элбэх дьиэ билигин чөлүгэр түһэриллибит. Быйылгы сылга 11 эбийиэк баар. Уон иккис эбийиэк — сөтүөлүүр бассейннаах успуорт комплекса. Ол сотору үлэҕэ киирэн, Докучаевскай олохтоохторо үөрүөхтэрэ. Тэрилэ барыта туруоруллубутун, таһынааҕы сирэ-уота тупсарыллыбытын кэнниттэн, оҕолорго уонна улахан дьоҥҥо кэтэспит эбийиэктэрэ аһыллыа«, — диэн этэр Ил Дархан.

Айсен Николаев ыкса сибээс олохтоммут куоратын икки улахан суолталаах эбийиэгэр үлэ быйыл саҕаламмытын бэлиэтээтэ.

—Оҕо айымньытын дьиэтигэр хапытаалынай өрөмүөн ыытыллыа. Бу дьиэ өрөмүөн диэни билбэтэҕэ ырааппыт. Ону сэргэ, Докучаевскайга ИТ-кииннээх ыччат киинин тэрийэргэ улахан үлэ ыытыллар, —— диэтэ Айсен Николаев.

Кини Докучаевскайга биир эрэ сыл үлэ ыытыллыбатын, манна дьон олоҕун тупсарарга төһө кэм наада буоларынан көмө оҥоһуллуоҕун эттэ.

ДНӨ баһылыга Денис Пушилин Саха сиригэр улаханнык махтанна. Кини сүргэтэ улаханнык көтөҕүллүбүтүн, куораттары үөрэ-көтө, хайдахтаах тупсан тахсыахтарын астына, киэн тутта көрөрүн бэлиэтээтэ.

—Санатан эттэххэ, бу Кировскай уонна Докучаевскай. Чөлүгэр түһэриллибит, арыт бүтүннүү саҥардыллан оҥоһуллубут эбийиэктэр наһаа уларыйаллар, тупсаллар. Бэл, бастаан былааннаммыттарыттан, толкуйдаммыттарыттан кытары атын буолан дьэндэйэн тахсаллар. Оннук холобурга, бүгүн көрбүт спортивнай комплекспытын ааттыахха сөп. Эбийиэги бүтэрэн эрэллэр. Манна киһи үөрүөх-көтүөх санаата кэлэр. Сотору кэминэн күрэхтэһиилэр ыытыллыахтара диэтэххэ, ис сүрэхпиттэн долгуйабын, үөрэбин, — диэн этэр ДНӨ баһылыга.

Денис Пушилин Докучаевскай уокуругар Еленовкаҕа култуура дьиэтин Саха сириттэн кэлбит исписэлиистэр өрөмүөннээн хайдахтаах үчүгэй гына  уларыппыттарын киэн туттан бэлиэтээтэ.

—Бу барыта нэһилиэнньэ инники олоҕор эрэлин күүһүрдэр, улаатыннарар. Оҕолор ханна дьарыктаныахтарын, үөрэниэхтэрин, билиилэрин-көрүүлэрин хаҥатыахтарын былаанныыр кыах баар буолла, — диир кини.

ДНӨ баһылыга Денис Пушилин Саха сирин байыастарын үрдүктүк сыаналаата.

—Кинилэр хорсун-хоодуот, дьоруойдуу быһыыларын көрөбүт, сыаналыыбыт. Саха сирэ нэһилиэнньэтинэн оннук элбэҕэ суох, ол гынан баран Дьоруойдара элбэхтэр. ДНӨ босхолооһуҥҥа Саха сирин байыастара дьоһун миэстэни ылаллар. Мин кинематографистар Арассыыйа Дьоруойа «Тута» — А.Григорьев туһунан киинэ устар туһунан этиилэрин өйөөбүтүм. Бу хоодуот байыас хорсун быһыытын туһунан дойдубут билэрин сэргэ, кэлэр көлүөнэ эмиэ билиэхтээх. Бу биһиги эбээһинэспит, — диир Денис Пушилин.

Эрэгийиэннэр баһылыктара өрөмүөннүүр-чөлүгэр түһэрэр үлэлэр, экэниэмикэ, үөрэх, култуура эйгэтигэр сибээһи тутан үлэлээһин туһунан кэпсэттилэр.

Саха сирэ Докучаевскайга 2024 сыллаахха 53 элбэх кыбартыыралаах олорор дьиэни чөлүгэр түһэрбитэ. Суоллары-иистэри, эбийиэктэри өрөмүөннээбиттэрэ. Маны таһынан, Еленовкаҕа МФЦ, баан отделениета, бибилэтиэкэ киирэр култуура дьиэтигэр уонна дьаһалтаҕа хапытаалынай өрөмүөн ыытыллыбыта.

Ыкса сибээс олохтоммут куоратыгар билигин Саха сирин быраастарын биригээдэтэ үлэлиир. Миэдиктэр суһал көмөҕө наадыйбыт дьону, хирургия отделениетын пациеннарын көрөллөр-истэллэр.

Маны сэргэ, Саха сирэ сибээс олохтоммут куоратын оҕолоругар лааҕырдарга сайыҥҥы сынньалаҥнарын тэрийбитэ, киинэлэри көрдөрөргө аныгы тэриллэринэн хааччыйбыта.

СӨ Ил Дархана Айсен Николаев ДНӨ үлэтинэн сырыытыгар тирэх пуун үлэтин бэрэбиэркэлээтэ. Докучаевскай куорат уокуругар Саха сирин исписэлиистэрэ чөлүгэр түһэрбит эбийиэктэрин көрдө-иһиттэ. Ол иһигэр, Еленовкаҕа култуура дьиэтин. Айсен Николаев Докучаевскайга куораттааҕы киин балыыһаҕа сырытта. Итиннэ бу күннэргэ Саха сириттэн харах балыыһатын быраастара тиийэн үлэлии сылдьаллар.

СӨ Ил Дарханын уонна Бырабыыталыстыбатын пресс-сулууспата