Айсен Николаев уонна Галина Данчикова РФ Бэрэсидьиэнин сорудаҕын олоххо киллэрии туһунан дьүүллэстилэр

Ил Дархан Айсен Николаев Москваҕа оробуочай сырыытын кэмигэр РФ Судаарыстыбаннай Дууматын дьокутаатын Галина Данчикованы кытары көрүстэ.

Көрсүһүүгэ Арассыыйа Бэрэсидьиэнэ Владимир Путин Саха сиригэр, ол иһигэр Федеральнай Мунньахха туһаайан эппит сорудахтарын олоххо киллэрии туһунан дьүүллэстилэр диэн СӨ Баһылыгын уонна Бырабыыталыстыбатын пресс-сулууспата иһитиннэрэр.

Айсен Николаев уонна Галина Данчикова Саха сирин социальнай эйгэтэ сайдыытын боппуруостарыгар улахан болҕомтолорун уурдулар. Ону сэргэ судаарыстыба баһылыга көҕүлээбит саҥа национальнай бырайыактарын олоххо киллэрии туһунан кэпсэттилэр. Туспа үлэ эрэгийиэннэр уонна Судаарыстыбаннай Дуума РФ Бырабыыталыстыбатын сыллааҕы отчуотун түмүгүнэн оҥоһуллар.
Маны таһынан байыаннай дьайыы кыттыылаахтарын уонна кинилэр дьиэ кэргэттэрин өйүүргэ туһуламмыт сокуоннар бырайыактарын уонна сокуоннары дьүүллэстилэр. Байыаннай дьайыы кыттыылаахтарын уонна кинилэр дьиэ кэргэттэрин өйүүргэ дьоһуннаах хайысханан дьону кытары үлэ, кинилэр ыйытыыларын быһаарыы, ол иһигэр төлөбүрдэри уонна чэпчэтиилэри кытары сыһыаннаах боппуруостары быһаарыы буолар.

Санатар буоллахха, дойду Бэрэсидьиэнэ Федеральнай Мунньахха туруорбут соруктарын түмүгүнэн Ил Дархан Айсен Николаев өрөспүүбүлүкэ Бырабыыталыстыбатын чилиэннэригэр кэккэ сорудахтары биэрбитэ. Ил Дархан дойдуга биэс саҥа национальнай бырайыак киирэрин бэлиэтээбитэ: «Дьиэ кэргэн», «Арассыыйа ыччата», «Каадырдар», «Уһун уонна көхтөөх олох» уонна «Дааннайдар экэниэмикэлэрэ».

Нацбырайыактар дьиэ кэргэн институтун бөҕөргөтүүгэ, оҕо төрөөһүнүн үрдэтиигэ, эдэр көлүөнэҕэ көмөлөһүүгэ, үөрэх уонна экэниэмикэ үрдүк технологиялаах эйгэтин сайыннарыыга туһуланаллар.