Айсен Николаев уонна Уус Алдан улууһун олохтоохторо Байаҕантай нэһилиэгин дьоруойдарын кэриэстээтилэр

Атырдьах ыйын 31 күнүгэр, П.П. Готовцев атынан Тандатааҕы устуоруйа-архитектура түмэлин сиригэр, Уус Алдан улууһун Байаҕантай нэһилиэгин дьоруойдарын бүүһүгэр сибэкки ууруу тэрээһинэ буолан ааста.

Тэрээһиҥҥэ өрөспүүбүлүкэ салалтата, норуот дьокутааттара, Арассыыйа Дьоруойа Алексей Неустроев, Үлэ Дьоруойа, Үлэ Албан аата уордьан толору кавалера Михаил Готовцев уонна улуус уопсастыбаннаһа кытыннылар. Ил Дархан Гражданскай сэрии Дьоруойа Гаврил Егоров уонна Сэбиэскэй Сойуус Дьоруойа Владимир Лонгинов пааматынньыктарыгар сибэкки уурда.

Күн бүгүн Уус Алдан улууһа тоҕус дьоруойунан киэн туттар, кинилэртэн түөрдэ Байаҕантай нэһилиэгиттэн төрүттээх.

Ил Дархан уонна Бырабыыталыстыба пресс-сулууспата.